Gyoengq baengzyoux sou siengj rox gou dwg boux vunz baenzlawz yiengh lwi? Neix gou couh gag gaisau swhgeij ba.

Gou dwg boux hagseng seiq nienzgaep, bineix cib bi lo. Gou miz aen naj hausag ndeu,naengbak gou daegbied hoengz, vunz mbouj rox lij laihnaeuz gou dwg daz naengbak cij hoengz ne. Doiq da gou ndongqliklik luenzlulu,yienghceij gou gig hawj vunz gyaez.

Mwh gou lij iq, daxboh daxmeh gou couh okbae dajgoeng, gou dwg youq ranz daxdaiq majhung, gou miz di gag yawjsiuj swhgeij, mbeiiq, youq gwnz godangz mbouj gamj hoizdap gij vwndiz lauxsae daezok haenx. Gou gig swnh, gou gyaez ciengx doenghduz iq, hix gyaez ndaem va’nywj, gou ciengx gvaq duzma, hix ciengx gvaq byagim caeuq duzgvi.

Gou gyaez vehveh, gou veh Haijmenz Baujbauj daegbied ndeiyawj, daxboh daxmeh cungj naeuz gou veh ndaej lumj caen ityiengh. Gou sij gij cih mauzbit hix haemq ndei, ciengzciengz ndaej daengz lauxsae haenh.

Gyoengq baengzyoux, seizneix sou rox gou dwg boux vunz baenzlawz yiengh luba, dwggyaez lwi?（指导老师：韦凤玲）