Youq Lungzanh, de ndaej rox Nazdungz Gunghse gihbwnj guh daengz gij suijbingz gyawj it vunz it moux nazbaujraemx, vunz miz 800 gaen haeux le, gig angq. De iugouz ndaw yienh gidij bang aen gunghse neix guh ndei gviveg, caenhvaiq saedyienh aen muzbyauh neix, aeu neix daeuj daiqdoengh daengx yienh roengzrengz byaij bae coh aen muzbyauh neix. De naeuz: “Gak dieg swhyienz diuzgienh caeuq fazcanj suijbingz mbouj doxdoengz, saedyienh aen muzbyauh neix ndaej miz gonq miz laeng. Gvanhgen dwg it boux vunz it moux nazbaujraemx, guh baenz diuz neix le, vunzvunz miz 800 gaen haeux cix mbouj nanz guh daengz lo.” De lij naeuz:“Couhsuenq guh baenz vunzvunz cungj ndaej 800 gaen haeux le, lij mbouj ndaej gangjmingz haeuxgwn raeuz gaenq gvaqgvan lo, hoeng ndwenngoenz Guengjsae ne dwg ndei gvaq di lo, raeuz cix ndaej engqgya simsoeng bae fazcanj gunghyez、doenghgo dajgai caeuq gij hong wnq lo.”

Bi 1972 ndwen 1, Veiz Gozcingh youq baez hoih gozda veiyi Swcigih Gwzveijvei 6 baez veiyi gwnzde youhcaiq giengzdiuh, yaek aeu miz giva miz yamqdin dwk anbaiz vunzguhhong, haenq guh hong nungzdenz gihbwnj gensez. Aeu ciengznienz guh, seiz hongnyaengq noix guh, seizhoengq haenq guh. Itdingh aeu youq 3-4 bi ndawde guh ok cingzcik engq hung daeuj, gaijbienq gij yienghceij doeklaeng hong hwnjguh nungzdenz gihbwnj gensez. De iugouz gak dieg youq baujcwng haeuxgwn demcanj aen cenzdiz neix lajde, cizgiz guh lai cungj ginghyingz, ceng ndaej gak cungj doenghgo ndaemgai ndaej daihfukdoh demmaj, hawj ndoengfaex、langh doihduz、fusizbinj、ciengx bya ndaej daengz cienzmienh fazcanj. De dizcang dawz seizdoeng dangguh swnghcanj aen geiqciet ndeu daeuj ca, cugbouh guh daengz yungh 1/3 naz ndaem byaekyouzcai、1/3 ndaem gofoed caeuq gij doenghgo dajgai gvaq doeng wnq, 1/3 guh genglaeg gaijnamh、cae dak gvaq doeng.

Swcigih Gwzveijvei laebbaenz le, caenhguenj deihfueng caizcwng ngaenz gaenjcieng, hoeng ciuqyiengh dawz ok daihliengh ngaenz bae guh nungzdenz gihbwnj gensez. Caiq gyahwnj guekgya bang ngaenz dem, gij ngaenz daengx gih roengz youq aen fuengmienh neix, bi 1969 dwg 9600 fanh maenz. Gvaqlaeng bi doek bi demlai, bi 1975 dabdaengz 1.55 ik maenz. Binaengz doengcin, cungj miz geij bak fanh vunzguhhong bae guh nungzdenz gihbwnj gensez. Bi 1974 seizdoeng mwh ceiq hoengh miz caet bet bak fanh vunz bae guh, giz cungdenj sihgungh miz 3.6 fanh giz. Bingzseiz, lij miz aen conhyezdui cib lai ngeihcib fanh vunz ndeu, genhciz baenzbi youq dieghong guh hong.

(caengz sat)