Lauj Cangh dwg boux lauxsae aen hagdangz gyauhgih he. Youq ndaw hagdangz de, ca mbouj lai cienzbouh dwg lauxsae mbwk coz, byawz hix mbouj siengj bae guh gij hong cungswiq diengzhaex haeunyaeng haenx. Lauj Cangh naeuz:“Gou daeuj cungswiq ba, fanjcingq gou daj iq couh baenz ndaenghaenz lo, nyouq haex mbouj raen haeu.” Baez guh, couh guh baenz cib lai bi. Lauj Cangh hix mbouj ndaej lai saek faen ngaenzhong, byawz hix mbouj laihnaeuz doiq de miz maz mbouj ngamj, bouxboux cungj nyinhnaeuz, lauj Cangh ndaeng mbouj ndei, wnggai guh cungj hong cungswiq diengzhaex neix. Haet seizdoeng nityuyu ndeu, lauj Cangh ciuqyiengh hwnq romh, de bae daemh haeuj bak dourug song dah lauxsae bae, baez boux baez boux got dawz dah lauxsae lij daenj buhninz caemhcaiq lij maezgae okdaeuj …… Gvaqlaeng canghyw naeuz, danghnaeuz daeuj ceiz 20 faen cung, song dah lauxsae neix lauheiq couh mbouj miz mingh lo. Yaucangj ngeizvaeg lo, lauj Cangh nyouq ndaej ok meizgi ha? Lauj Cangh fwt riu, hix mbouj guhsing. Daj baezneix hwnj, gyoengqvunz ciengzseiz raen lauj Cangh gongzhwet cungswiq diengzhaex……