Mbangj saeh mbangj leix gag caj nanz ndaej roxyiuj, yaekaeu caenndang ginglig gvaq cij rox.

Aicingz cungj dwg ndij gak cungj leih’ik、gvanhaeh doxngaeu, gwnzbiengz mbouj miz saek yiengh gamjcingz seuqcingh, hoeng, dingzlai vunz youq gwnzbiengz cungj gag ra ndaej faenh aicingz bonjfaenh, neix dwg aenvih，moix boux vunz cungj mizmbangj vuzciz sihyau, swhgeij mbouj seuqcingh, hix couh mbouj caiq yauhgiuz bouxwnq siengjfap seuqcingh.

Beixnuengx ndawde seiziq caen lumj fwngz caeuq din, hoeng, hung le, couh gak boux gag an’gya lo, daj mbouj caemhdoih gwn rek haeux ndeu hwnj, couh menhmenh liz gyae lo. Daegbied dwg ginghci suijbingz roxnaeuz sevei diegvih ca haujlai, caen dwg yied daeuj yied mbouj miz vah doxgangj, daengz miz ngoenz ndeu, lienz swhgeij hix saenq mbouj ndaej, bide, geiq ndaej ndij bouxvunz yienghde caemh youq, doxgyaez lumj fwngz caeuq din.

Bohmeh caeuq lwg yingjyangj gizsaed hix miz hanhhaed, boux vunz ndeu cungj siengj yawjraen gij doxgaiq swhgeij siengj yawjraen haenx, hix cungj dwg ganjgyoz ndaw dungx swhgeij cij miz huq. Ndaw ranz doxlumj, gak boux singqcingz mbouj doxdoengz, neix cungj dwg gak boux gag lienh ndaej okdaeuj.

Deng gwnvi, ceiqndei bouxlawz hix mbouj lwnh, boux dog gag nyaenx youq. Nyaenx mbouj ndaej seiz, ndij baengzyoux roxnaeuz vunzcaen gangj, ndawsim couh cwxcaih haujlai, hoeng, cungj miz saekseiz mwngz yaek ienqhoij, gawqyienz byawz hix bang mbouj ndaej byawz, youh hozbiet hawj gyoengqde yawjsiuj ne?

Gwnzbiengz miz haujlai saeh mbouj goengbingz、mbouj goengcingq、mbouj gyaeundei, hoeng, aeu gvaq ndei moix ngoenz, mienhdoiq moix boux vunz, aenvih mwngz mbouj siengj riu, bouxwnq engqgya mbouj hawj mwngz riu ndaej ok bak. Danghnaeuz vunz caeuq vunz gvanhaeh maqmuengh sang lai, mwngz itdingh rox saetmuengh, hoeng, mwngz ciengxlwenx hix ciengeiz gaej naeuz mbouj miz muengh, vunz youq gwnzbiengz, cungj miz di raeuj he caeuq di ndei he caj mwngz bae fatyienh.

Mwngz gangjnaeuz mwngz geq lo rox louzlienh seizcoz, saedcaih mwngz di ndeu caemh mbouj louzlienh ngoenzlwenz, aenvih mbouj miz ngoenzlwenz naengz hawj mwngz ngeixdauq gij ndei, baenzneix, mwngz yawj dauq baihlaeng, mboujyawx yawj bae coh baihnaj, cijaeu mwngz lij lix, ngoenzcog couh lij miz haujlai haujlai gojnwngz ne!