Ciengzgeiz baenzae: Aeu mingz- fanz liengx ndeu, nienj mienz heuz meiq gyaux baenz giengh, haemh- naengz yaek ninz gaxgonq aeu naed baenz duhhenj hung oep song angjdin giz yungjcenz, yungh baengzsa suek ndei, haet daihngeih biengj bae, lienz guh 7 ngoenz.

Ae’ngab: Aeu buenq gaen duz- ndwen sauj, cauj henj ngenz baenz mwnh, aeu begdangz heuz raemx gwn, moix baez buenq beuzgeng, ngoenz gwn 2 baez, gwn liux couh ndei. Geih gwn huqmanh.

Dungxin、rueg raemxsoemj、dungx doekduiq、veidouyenz: Moix baez aeu gyaeujsuenq hung liengx ndeu, daiq byuk coemh remj. Dwk vanj raemx ndeu cawj goenj, heuz di begdangz ndeu mwh dungx byouq seiz gwn, ngoenz 2 baez, lienz gwn 7 ngoenz couh gatrag.

Dungx、cibngeihcijcangz biux naeuh: Aeu 30 aen gvamgyaeq cauj remj nienj mienz, buenq gaen mbamienh cauj remj, gyonjgyoeb gyaux yinz, haethaemh yaek gwn haeux gaxgonq yungh raemxgoenj heuz gwn, moix baez byongh beuzgeng, ngoenz gwn 2 baez, itbuen gwn fuk ndeu couh ndei, boux baenz naek gwn 2 fuk ndeidingh.

Hezyaz sang、hezcij sang: Aeu ceh byaekginzcai liengx ndeu, baengzsa suek ndei, dwk rek gya 10 gaen raemx baek dang, gyanghaet、banngaiz、 gyanghaemh gak gwn cenj ndeu. Boux gwn ndaej manh haenx, gyanghaet、banngaiz、banh- aemh gak gwn 2 aen gyaeujsuenq ndip dem, ndaej gyangq hezyaz caeuq hezcij.

Binghsimdaeuz、gvanhsinh- bing: Moix baez aeu byuk duhdoem liengx ndeu, 5 cienz duhheu, baek vanj raemx ndeu gwn, ngoenz gwn 2 baez, lienz gwn byongh ndwen.

Cangzveiyenz、dungxsiq: Moix baez aeu buenq liengx mbamienh cauj remj, dwk di begdangz ndeu yungh raemxgoenj heuz yinz, caengz gwn haeux gaxgonq gwn, ngoenz 2 baez, lienz gwn 2 daengz 3 ngoenz. Geih gwn lwgndae、gyoijhom caeuq gijgwn youznywnx.

Dungxraeng: Luep naeng ndaw dawgaeq 4 liengx cauj henj nienj mienz, yaek gwn haeux gaxgonq aeu raemxbegdangz heuz gwn, ngoenz 2 baez, moix baez byongh beuzgeng, lwgnyez gemj buenq, gwn fuk ndeu couh ndei, geih gwn saenaz.