Seiqvunz dwg bonj saw na ndeu，moix yieb cungj geiqloeg rizdin raeuz majhung.

Seizcin bae seizcou daeuj，va loenq va hai. Yaepyet, gou majhung lo, hix cugciemh roxyiuj swhgeij baenzlawz majhung, couh lumj byaij haeuj suen bae bak cimz lai cungj lai yiengh lwgmak ityiengh, soemj、van、saep、manh gijmaz goj miz caez. De yaep ndeu hawj gou doek raemxda, yaep ndeu hawj gou simhai, yaep ndeu hawj gou doeknaiq, yaep ndeu hawj gou gikdoengh.

Ngoenzneix, couh hawj gou youq ndaw sam nyied bae cunzcet baez majhung ndeu, menhmenh bae cimz gij soemj van saep manh ndaw seiz majhung.

Majhung dwg soemj. Youq ndaw duenh ndwenngoenz dinjdet neix, nanzmienx miz saekseiz mbouj hab- eiq. Seizde, gou gig siengsim, lumj deng vunz yoek mbat mid ndeu haeuj simdaeuz bae nei, mwhde itdingh lwed lae baenz dah, daengx ndang sieng caez. Hoeng, gou itcig nyaenx youq, nyaenx youq, aenvih gou gig giendingh dwk siengsaenq, “ndit oq cungj youq baihlaeng rumz caeuq fwn”、“giemqbauj raeh daj rinbaenz muz ok, vamoiz hom youq ndaw nit ndaej ma”.

Majhung dwg van. Gou dwg dah lwgmbwk gig angjak ndeu. Moixdang saetbaih gvaq le, gou cungj vaiqvet diuzcingj ndei simcingz. Gou mbouj rox vih saetbaih bae ra yenzyinh, cij rox itcig roengzrengz, cagaenj mbouj cuengqsoeng. Roengzrengz ceng’aeu youq baezlaeng deuqnyex yungh bak mij suzdu cung bae coh satbyai. Mwh yat gvaq moix aen gvan, hamj gvaq moix goengq bya, gou sim’angq lumj ndaej dang cungjdungj ityiengh.

Majhung dwg saep. Youq aen seizdaih riengjret fazcanj、ngoenz moq gvaq ngoenz, gou dangguh boux cunghyozswngh ndeu, miz aen atlig caeuq nyapnyuk lumj goengqbya nei. Sinh Hiciz naeuz:“Lij iq mbouj rox gij feihdauh youheiq……vih miz swzmoq ngangz simyou”. Gizsaed dou atlig mbouj beij bouxhung noix. Hagsib、gyadingz、youheiq……Mbangj aen vwndiz cungj “mbouj lau sinhoj” dwk daeuj sauyaux gou, hawj gou mbouj miz saekseiz gamj daengz sim soeng gvaq.

Majhung dwg manh. Gou ndaej lijgaij, “manh” cih saw neix daiq gig aensim gou lo. Youq seiz majhung, gou rox bungz daengz haujlai deuqnyex, gyoengqde couh lumj duznyaen rengz hung baenzneix, youq gocwngz deuqnyex ndawde hawj bouxvunz sim diuq gyavaiq, hanh lae rim naj. Deuqnyex gvaq le, youh gamjdaengz caemh sangjsag, ndaej hawj mwngz gamjdaengz feih siu mbouj caenh、lumz seiz dauqranz.

Majhung dwg miz lai feih caemh ndeindi. Youh lumj souj sei lumj fuk veh nei, gou lumj duj valup yaek hai nei, ciengzseiz san aen fangzhwnz loq ndeindi swhgeij. Ngoenzlwenz, gou dawz gij dauqngeix laeglemx dwk bae, ngoenzneix, gaem youq ndaw fwngz, hoeng ngoenzcog ne, gij ronghlwenq cingq caj raeuz. Raeuz caez ciengq yiengj diuzgo duhraeuz, diuq gij foux duhraeuz, gvaq ndwenngoenz gyaeundei, vaiqvued mbouj miz youheiq dwk ndeindei majhung ba.