●7 nyied 17 hauh, youq Yungzsuij Myauzcuz Swciyen Bwzyinz Yangh Baujgyangh Cunh, doenghboux Myauzcuz、Yauzcuz、Dungcuz daengj vunz saujsu minzcuz daj mbanj doxgyawj daeuj comz youq henz Dahbaujgyanghhoz, ciuq sibgvenq guh hozdung baiqmiuh、sauz bya nem gwn ngaiz bak ranz daengj, aeu neix daeuj maqmuengh ndaem maz ndaej maz.

(Lungz Linzci)

●7 nyied 10 hauh daengz 15 hauh, Fangzcwngzgangj Si saujsu minzcuz ganbu beizyinbanh youq Swcigih Dangjyau gawjhengz. Baez beizyin neix caenh’itbouh hagsib gvancez gij cingsaenz dangj cibbet gaiq seiqcung cienzhoih, hagsib gij cingsaenz youqgaenj gvendaengz vahgangj Siz Ginbingz ceiqgaenh gangj de. Aen si neix mizgven danhvei、gak yienh(si、gih) bouhfaenh gohgiz saujsu minzcuz ganbu gungh 47 vunz camgya beizyin.

(Fu Yenzgez)

●7 nyied 14 hauh, Dunghlanz Yen gawjhengz Mbanjcuengh yingh- yungz vwnzvayenz gvanjlijcu biengj baiz yizsi. Daj neix daengz laeng, aen gvanjlijcu neix ciuq baihgwnz anbaiz, guh ndei hong gwzming vwnzva aen yienh neix, caez haenqrengz guh ndei hong senhconz gyaezguek、gwzming conzdungj nem minzcuz doxgiet, caez laemxsim gensez ndei Dunghlanz.

(Veiz Swngyang Veiz Damingz)

●7 nyied 16 hauh, Lungzlinz Gak Cuz Swciyen Gwzlauj Yozvei daih’it gaiq veiyenz davei youq ndaw yienh dangjyau ciuhai, dangdieg vunz miz- gven nem Gveicouh Swngj Gwzlauj Yozvei、 Cunhyi Yen Gwzlaujvei doenghboux daibyauj daengj gungh 132 vunz camgya. Laebbaenz aen yozvei neix, doiq henhoh、vatgud、fatyiengz nem swnjcienz vwnzva lizsij Gwzlaujcuz aen yienh neix gig miz yungh.

(Dauz Dwzgvangh)

●7 nyied 15 daengz 16 hauh, Gvangjsih Minzcuz Bozvuzgvanj Yenz- giubu geij boux lauxhangz、yozcej daengz Ginhsiu Yauzcuz Swciyen Luzhang Yangh guh song ngoenz hong diuyenz cingzgvang henhoh nem hwngfat vwnzva minzcuz, haenh aen yangh neix guh ndei hong henhoh vwnzva minzcuz, caemhcaiq daezok genyi miz gensezsing、fazcanjsing.

(Gauh Yuzginh)