Ranz dwg dieg dangjrumz, ranz dwg dieg raeujrub, ranz dwg daxboh daxmeh gyaez gou haenx.

Daxboh gou dwg boux geiqsingq mbouj ndei ndeu, de guhsaeh mbouj dwg lumz yienghneix couhdwg lumz yienghhaenx. Hoeng, danghnaeuz dwg gvendaengz gij saeh gou, de cungj mbouj lumz gvaq.

Miz baez ndeu, daxboh bae yienhsingz okcai, gou siengj cawx bonj saw《Sijcoz Cijnanz》ndeu, couh doiq daxboh naeuz:“Daxboh, mwngz bang gou cawx bonj saw《Sijcoz Cijnanz》 ma, ndaej lwi?” Daxboh ngaekngaek gyaeuj naeuz:“Ndei.”Ngoenz daih- ngeih, daxboh ma daengz ranz, gou sikhaek buet daengz baihnaj daxboh, cam daxboh aeu saw. Daxboh nyauj- nyauj gyaeuj, naeuz lumz lo. Raen daxboh cungj yienghceij neix, gou saetmuengh lo, gawq vah ndeu mbouj gangj couh buet haeuj ndaw rug gou bae. Daxboh rox gou fatheiq lo, lienzmuengz byaij daengz bak rug gou, roq dou naeuz: Yingzcun, hai dou vei, daxboh caeuq mwngz gangjriu cungj mbouj ndaej la?” Gou han naeuz: “Lumz couh lumz lo, lij miz naj naeuz gangjriu.” Daxmeh dingqnyi le, naeuz: “Yingzcun, daxboh caen dwg caeuq mwngz gangjriu bw, mbouj saenq ha, mwngz hai dou okdaeuj yawjyawj.” Dingq daxmeh yienghneix gangj, gou yaek saenq mbouj saenq hai dou lo. Cijraen daxboh ndaw fwngz gaem bonj saw moq ndeu, byaij haeuj ndaw rug daeuj, doiq gou naeuz: “Gij saeh lwg gou gou baenzlawz lumz ndaej ne. Hawj, neix couhdwg bonj saw mwngz siengj cawx haenx, mwngz ndeindei yawj ba.” Gou song fwngz ciep aeu bonj saw, caen dwg bonj saw gou siengj cawx haenx. Gou angq dwg raemxda conh okdaeuj lo.

Caiq gangj, daxmeh gou dwg bouxvunz gyaez yawj densigi ndeu, hoeng, vihliux mbouj nguh gou hagsib, daxmeh cijndaej mbouj yawj densigi lo. Moix baez gwn caeuz le, daxmeh couh aeu diepcih daeuj lienh sij cih. Yienznaeuz sij ndaej mbouj ndei yawj, danhseih de ngoenzngoenz cungj genhciz lienh. Daxmeh gij cingsaenz neix hawj gou gig gamjdoengh. Miz seiz gou yawj saw baeg lo, daxmeh couh soengq boi cijvaiz raeujrub ndeu hawj gou, moix baez gou danqheiq seiz, de couh lumhlumh gyaeuj gou, got gou youq najaek de, caeuq gou gangj goj, gujli gou gaenx hagsib……

Ndaw ranz bohmeh hawj gou gamjdaengz gig raeujrub, gou gyaez daxboh daxmeh gou, gou gyaez ranz gou.

（指导老师：陆春梅）