Bouxvunz mbouj dwg yungh mwngz moix baez gaujsi ndaej geijlai faensoq daeuj dagrau, hix mbouj dwg yungh gyau geijlai boux baengzyoux roxnaeuz mwngz geijlai saundei mbauqndei daeuj dagrau, neix gak boux vunz ndawsim gag miz diuz cik ndeu, gag miz ganj caengh ndeu.

Boux vunz mbouj dwg naeuz gaengawq mwngz baenzlawz anbaiz saedceij daeuj dagrau, hix mbouj dwg naeuz mwngz caeuq bouxlawz baedauq hwnjroengz bouxwnq couh siengj bae gauxca, neix gak boux vunz gag miz aen yenzcwz ndeu. Caeuq bouxlawz gap baengzyoux gap geijlai boux baengzyoux daengzlaeng baenzlawz doiq bouxwnq daeuj gangj gaenbonj mbouj yungh bouxwnq bae ceijdiemj.

Boux vunz mbouj dwg naeuz yungh mwngz daenj buhvaq ndeirwix daeuj dagrau, hix mbouj dwg aeu mwngz singqgaep hozunq daeuj dagrau, neix gak boux vunz gag miz singqcingz swhgeij.

Yienghneix, boux vunz raeuz dauqdaej yungh diuz cik lawz daeuj dagrau ne?

Gou nyinhnaeuz dwg baenzneix, dwg youz mwngz vih vunzlai roxnaeuz bouxwnq daiq daeuj geijlai vaiqvued geijlai sienghaih dagrau, dwg youz mwngz soj gangj soj guh doiq bouxwnq daiq daeuj gijmaz leih’ik gijmaz sonjsaet bae dagrau. Dagrau boux vunz youq ciuhvunz ndawde dwg mbouj dwg caeuq vunz doxhuz doxndei、haengjgyaez bang vunz, neix ndaej dangguh gij ndei daeuj danqhaenh; danghnaeuz ciengzseiz vih di siujsaeh couh fathuj caeuq vunz doxceng doxndaq caemhcaiq doxmoeb, neix dangyienz couh wnggai dangguh lingh cungj vah daeuj gyangzheiq lo.

Dagrau boux vunz couh dwg mwngz guh ok moux cungj buenqduenh、guh ok gij buenqduenh neix yenzyinh dwg gijmaz; dagrau boux vunz couh dwg yawj mwngz dauqdaej yawjsiuj roxnaeuz ienq- haemz bouxlawz; dagrau bouxvunz hix baugvat mwngz ndaenq bouxlawz mwngz lau bouxlawz, caemhcaiq baugvat mwngz baenzlawz gyaeuj ngunh mbouj rox faplwd baenzlawz bae bauqcaeuz bouxlawz.

Dagrau bouxvunz dangyienz hix baugvat gij gyaez ndawsim、aeueiq gingqcungh bouxwnq, hix nangq- daengz mwngz baenzlawz bae beizyangj gij ganjcingz neix. Engq youqgaenj dwg, dagrau bouxvunz dwg yawj mwngz dwg mbouj dwg yungh diuzmingh mwngz bae nyinhdumz aensim bouxwnq.

Cijmiz mwngz senj aeu gij fuengfap ndei daeuj yingjyangj bouxwnq, aen gietdingh neix couh dwg gij yiyi ndaw ngoenznaengz swnghhoz mwngz.

Gyau boux baengzyoux ndeu aeu rox baenzlawz bae docih bouxwnq naengz yungz ndaej swhgeij, gyau boux baengzyoux ndeu couh dwg cungj fukheiq ndeu, naengz caeuq bouxwnq gap baengzyoux couh dwg aen danaj caeuq gienzleih mwngz lo. Neix nanzdauh lij aeu caj bouxwnq bae son cij rox ha?