Mwh doeg siujyoz , miz song boux banhcujyin hawj gou ceiq nanzlumz, song boux de mboujdanh dwg boux lauxsae gou, engq lumj daxmeh gou、baengzyoux gou .

It nienzgaep seiz, banhcujyin gou dwg boux mehmbwk gyaeundei ndeu——Veiz lauxsae. Veiz lauxsae couh lumj dahcej dou, naihsim son gyoengqdou, hawj gyoengqdou hag ndaej cihsiz, roxdaengz dauhleix. Geiq ndaej miz dangz yijvwnz ndeu，Veiz lauxsae gangj sat le, couh hawj gyoengq doengzhag guh lienhsij. Guh dwk guh dwk, sawqmwh, “ciengq” cih saw neix gou mbouj rox sij, gou couh dingz roengzdaeuj, doeng yawj sae muengh. Couh youq mwh haenx, Veiz lauxsae cingqngamj byaij gvaqdaeuj, de yawjraen gou yienghneix, couh rox gou deng nanz dwk lo, couh yiemzsuk naeuz:“Cih saw neix, haxbaenh gou ngamq gangj gvaq, mwngz itdingh dwg mbouj dingq lauxsae gangj, yienghneix couh mbouj geiq ndaej lo.” Daengx ban doengzhag cungj yawj gvaq gou daeuj, gou naj nding rwz dit. Dingz yaep ndeu le, Veiz lauxsae youh riu naeuz:“Mwngz siengjsiengj, ciengqgo seiz yungh gijmaz ciengq?” Veiz lauxsae baenzneix gangj, gou couh rox lo, couh sikhaek nyinhcaen sij hwnjdaeuj .

Seizgan gvaq ndaej caen vaiq, gou hwnj sam nienzgaep seiz, banhcujyin gou vuenh baenz Liengz lauxsae, de hwnjdangz gig hozyoz. Miz baez ndeu, Liengz lauxsae hawj dou hwnj dangz cozvwnz caeuq bouxwnq mbouj doengz ndeu. De sien dawz daizdaengq baiz baez cih“回”， caiq hawj gyoengq doengzhag faen baenz song cuj, cuj ndeu dang“hagseng hwnjdangz”, cuj ndeu dang“bingzveij lauxsae”. Gijmaz cungj cunjbei ndei lo, daengz hwnjdangz lo, Liengz lauxsae daj ndaw daeh dawz ok haujlai mbaw youzbiuq hawj gyoengq doengz- hag yawj, miz nding miz loeg, miz hung miz iq…… hawj gyoengqdou yawj ndaej dava bae. Ciepdwk Liengz lauxsae dawz song mbaw okdaeuj nem youq gwnz hwzbanj, hawj dou rara yawj miz gijmaz mbouj doengz, gyoengq doengzhag cungj ceng bae ra okdaeuj: Miz di naeuz saek mbouj doengz, miz di naeuz yiengh gyaeuj mbouj doengz, miz di naeuz hung iq mbouj doengz…… Moix boux gangj cungj mbouj doengz. Dangz haenx, gou sawqmwh fatyienh, mbaw youzbiuq iq gingqyienz miz yienghneix lai deih- fueng hawj raeuz cazyawj. Lingz roengzdangz yiengj lo, gyoengqdou cix lij maez youq ndaw dangz cozvwnz mizyinx neix, mbouj siengj roengz- dangz.

Song boux banhcujyin gou yienz- naeuz bujdungh, danhseih de nyinh- caen son dou cihsiz, hawj gou daengx ciuh vunz cungj mbouj lumz ndaej.

（指导老师：农色票）