6 nyied 23 hauh, Yangzsoz Yen Fuzli Cin miz aen cwngheuh “Aen Yangh Yisuz Ndawbiengz Daengx Guek” haenx gawjbanh “Ngux Nyied Bet” Ciet Minzsuz Vwnzva Lijyouz, geij fanh boux hekyouz ndaw guek rog guek caeuq vunzlai dangdieg camgya aen ciet conzdungj neix.

Banhaet 8 diemj cung, youz 400 lai boux vunzlai guhbaenz aen vwnzyi duivuj hainduj youzbyaij. Ndaw doihbyaij miz geiz、 foux lungz foux saeceij、 bauqva、 gyong daengj doihvunz, cezmuz lai cungj lai yiengh gig ndeiyawj, yinx haujlai vunz ndiengq din dwk yawj. Vwnzyi youzbyaij sat le, aen cin neix lij gawjbanh bonjdieg gvangjcangzvuj doxdax. Hozdung haemh haenx, aen cin neix gyoengq boux gyaez vwnzyi lij vih beksingq dangdieg yienj ciengz vwnzyi cezmuz he.

Ciuq bouxgeq dangdieg naeuz, Gaifuzli “ngux nyied bet” dwg daj Cinghcauz geizlaeng hainduj, daengz seizneix gaenq ndaej 300 lai bi lo. Gaenh geij bi neix daeuj, Fuzli Cin Cwngfuj baengh aen ciet minzsuz“ngux nyied bet”neix, gaijbaenz ciet minzsuz vwnzva lijyouz, muzdiz dwg hungzyangz Fuzli Cin ndawbiengz vwnzva yisuz, gya’gvangq Fuzli Cin doiqrog ginghci doxgyau, hawj Fuzli Cin ginghci hwngfat ndaej engqgya ndei.

(Siz Hungzmeiz/石红梅 Cinz Suhminj/陈淑敏 Ya Cicing/夏智婧)