Vahcuengh 《Hoenx Yahvaiz》

Youq Gingloz Siujyoz Sawq Ingj Ndaej Haenh

Vujmingz Yen Gingloz Siujyoz mwh angqhoh “roekit” cietlwgnyez, Gvangjsih Densidaiz daiq bouh dung’vaben Vahcuengh 《 Hoenx Yahvaiz 》 dajsuenq youq “roekit”geizgan cuengqingj haenx bae ndaw hagdangz cuengqingj, hawj gyoengq hagseng sien ndaej gvaqyinx mbat ndeu. Bouh dung’vaben neix dwg Gvangjsih Densdaiz vih swnjcienz vwnzva minzcuz, caemhcaiq gya’gvangq gij yingjyangjliz 《Baenzdauq Dungvaben Goj Saujsu Minzcuz Ndawbiengz》 haenx,cix dawz bouh dung’vaben 《 Hoenx Yahvaiz 》 fanhoiz baenz Vahcuengh.

Goj 《Hoenx Yahvaiz》 youq vunz banlaux Vujmingz seiz lijiq haenx, bouxboux cungj rox. Gojgaeq lwnhgangj duzyahvaiz gyajcang yahdaiq, doeklaeng deng song boux lwgnyez beixnuengx Mbanjcuengh nyinh’ok, caiqlij maenh’ak lingzloengz dwk dawz “duzyahvaiz” gyaep ok ranz bae. Sawq ingj yienhciengz gig nauhyied, gyoengq doengzhag riengz gij cingzcez de riuhaha, sawq ingj sat le cungj hemq naeuz mbouj gvaqyinx, gouz cuengq baez daihngeih.

Sawq ingj sat le, swcigih caeuq yienh mizgven lingjdauj、 gyoengq fanhoiz、 boiqyaem、 Vujmingz Yen minzsuz conhgyah caeuq sawq ingj hozdung lauxsae hagseng daibyauj hai baez hoih he, daihgya cungj nyinhnaeuz, 《Baenzdauq Dungvaben Goj Saujsu Minzcuz Ndawbiengz》dwg doiq ndawbiengz cienzgangj dizcaiz vatcimh caeuq gaijbien gig miz ik, vah minzcuz fanhoiz engq ndaej daengz bouxyawj daegbied dwg lwgnyez dieg saujsu minzcuz haengjgyaez, doiq gyoengq lwgnyez hungzyangz caeuq swnjcienz minzcuz vwnzva engqgya miz gij cizgiz doidoengh cozyung. Ndaw doz dwg gyoengq doengzhag Gingloz Siujyoz caeuq gyoengq boux fanhoiz boiqyaem dung’vaben caez youq itheij.

(Vangz Sauvuj/黄绍武)