Veiz Gozcingh gig gvansim swcigih dangjan ancienz. Mwh ngamq guh cunjbei hoenxciengq, de caeuq Gyauz Yaujgvangh、Vuj Cinnanz、Ho Hihmingz、Cinz Yinggih、Anh Bingzswngh、Ho Fan、Ouh Cifu daengj goengdaeuz doxyaeng, daezok youq diegbya baihsae Guengjsae hwnjguh ranzyo, senj dangjan youqgaenj daengz gizde bae yo. Daihgya cungj doengzeiq gij yigen de, gietdingh youz cunjbei hoenxciengq bangunghsiz roengzfwngz banh gienh saeh neix. Sij Cinghswng daiqlingx geij boux bangunghsiz dungzci genj ndei giz ndeu, veh ndei doz le lwnh hawj Veiz Gozcingh caeuq Cinz Yinggih nyi, naeuz gizde gyawj goengloh, henz roen miz goengq bya ndeu, daj rog goengloh yawj mbouj raen baihndaw, henzgyawj ngamq miz geij hoh beixnuengx Yauzcuz youq, gizde doekgungx youh ancienz, gyaudoeng hix fuengbienh. Veiz Gozcingh dingq le gig habhoz, Cinz Yinggih caemh doengzeiq. Veiz Gozcingh naeuz: “Dangjan dwg gihmiz caeuq caizfouq dijbauj guekgya raeuz, gienh saeh neix dingh le couh sikhaek bae guh”. Veiz Gozcingh youq “Vwnzgwz” cibfaen gannanz lajde, lij nda’nduengq geiqmaeuz cujciz cidoih dawz gij huq gyoengq lwgminz Yeznanz gaenj yungh haenx soengq bae daengz Yeznanz.

Bi 1964, gunghginh moux bu souhmingh senj daengz Namzningz saedhengz yinvu. Guengjsae raeuz caezsim roengzrengz bae cihciz gunghginh cap youq Guengjsae haenx hwnjguh caeuq gunghawj houginz. Youq Ningzmingz、Denzyangz、Gveilinz daengj dieg gaenjgip hwnj le geij aen feihgihcangz hawj bing yungh, Veiz Gozcingh caenndang cazcam, cijsi mizgven bumwnz gibseiz gaijgez dieg yungh feihgihcangz, cagaenj hwnjguh, hanhgeiz guh baenz. Doiq gyagvangq Vuzhih Feihgihcangz de caemh caenndang bae sonyinx. De naeuz gyoengq goengdaeuz cunjbei hoenxciengq bangunghsiz, gij gungh- ginh cap youq Guengjsae haenx rap dwk gij hongnaek henhoh guekcoj baihnamz haenx, seiqseiz cungj yaek bae dingjhoenx Meijgoz feihgih daeuj ciemqfamh, gyoengqde siengj aeu gijmaz, raeuz caiq hoj hix aeu bang gyoengqde gaijgez, bang gyoengqde baiz you gej nanh. Gij gunghginh cap youq Guengjsae haenx haekfug gak cungj gannanz, haenq lienh bonjlingx, buekmingh hoenxciengq, 10 baez youq gwnzmbwn Guengjsae dwk doek Meijgoz feihgih fouzvunz hai haenx. Doenghgij saeh neix, gig daih gujvuj le gyoengqvunz Guengjsae caeuq vunz ndaw guek. Veiz Gozcingh caenndang ciepraen gij vunz miz goenglauz dwk feihgih Meijgoz doek haenx, gujli gyoengqde caiq haenqsim roengz- rengz, laemxsim mied raeg sojmiz gij feihgih vunzdig haeujciemq bae.

Veiz Gozcingh gig yawjnaek gij hong minzbingh. De youq Vujmingz Liengzdungz seiz, caenfwngz ca hong cingjdun cujciz minzbingh, nyinhcaen gvancez aen cijsi Mauz cujsiz gvendaengz “hong minzbingh aeu guh daengz cujciz lozsiz, cwngcwz lozsiz caeuq ginhsw lozsiz”. Ndaw hong cunjbei hoenxciengq, de daegbied iugouz gak gaep dangjveij caeuq yinzminz vujcanghbu cietsaed gya- giengz lingjdauj hong minzbingh, guh ndei “sam aen lozsiz”, guh daengz “baez heuh couh daeuj, daeuj le hoenx ndaej ciengq”. De doiq boux dungzci ginhgih ca hong minzbingh haenx naeuz: “Minzbingh dwg aen bouhfaenh youqgaenj gyoebbaenz rengz vujcangh guek raeuz ndeu, de caeuq yinzminz gaijfangginh doxcaeuq rap hwnj diuz rapnaek henhoh guekcoj raeuz. Guh ndei hong minzbingh le, danghnaeuz Meijdigozcujyi gamj hoenx haeuj daeuj, itdingh dauqcawq deng hoenx, doek roengz ndaw haij gyoengq lwgminz hoenxciengq haenx bae.” (caengz sat)

Guengjsae

□ Hoz Saubangj sij Cinz Siengzcouh Liuz Gingliuj Cinz Siengzgen hoiz