Gou geiq ndaej, seizhah caen- cingq daeuj daengz, dwg daj duzbid swenj sing daih’it hainduj. Youq raeblaeng ranzgaeuq gou, miz diuz haenzdah raezrangrang he. Laj haenzdah ndaem miz haujlai faex, youq ndaw benq ndoeng neix, couh dwg aenranz duzbid, hix dwg giz duzbid hemqswenj ceiq nauhyied ndeu.

Youq ngoenz ndeu ndawde, duzbid hemqswenj caemh mbouj doxdoengz. Gyanghaet hemqswenj godan youh raezrang. Daengz ban- ngaiz, ndit haenq lumj feiz, mbwn ndatfwdfwd, duzbid hemqswenj gaenj- gip、sing gok caemhcaiq miz di coegrwz. Daengz haeujhaemh, duzbid hemqswenj naiqnuek, lumj bouxvunz baenzngoenz guhhong naetnaiq it- yiengh.

Daengngoenz doek bya, hainduj laepmomj. Gyoengqvunz gwn caeuz sat, couh gaemdawz gaiqbeiz, gaemdawz cazboi, roxnaeuz gienj fan diemx ndeu, lumj bae haw nei comz bae coh ndoengfaex. Bouxlaux miz bouxlaux naemjngeix, lwgnyez miz lwgnyez dajsuenq. Dou haengjgyaez doxdoengz, couh dwg siengj comz itheij dingq duzbid hemqswenj. “Nget-Nget”, sing de seuqset caemhcaiq raezred. Ngamq hainduj, baenz gyoengq baenz raq hemqswenj, daengzlaeng gyoengq bid wnq lumjnaeuz deng ganjyenj nei, foenfoen gaenriengz hemqcaca, yaep- seiz, daengx benq ndoeng cungj dwg sing bid goenjhuhu. Caiq gvaq sam daengz haj faen cung, gyoengq bid lumjnaeuz swenj baeg lo, singyaem daj giengz daengz yox. Danhseih gvaq yaep ndeu, sing bid youh sawqmwh goenj hwnjdaeuj, lumjnaeuz miz vunz bae cijvei de ityiengh. Haujlai lwgnyez manzgaengq, mbouj gag dingq bid swenj. Gyoengqde menhmenh benz hwnj gofaex bae, menhmenh depgaenh duzbid, cik fwngz ndeu got dawz ganjfaex maenhcat, lingh cik fwngz cix iet bae coh duzbid. Yaepyet, duzbid lumjnaeuz yaek miz yungyiemj daeuj daengz, doq mbin deuz lo. Seizde, gyoengq lwgnyez gag gyangz gag doeknaiq, menhmenh nod roengz laj faex daeuj.

Mwhhaenx, cungj miz vunz byaij haw gvaq luengq heuh “sou byuk duzbid”. Dingq bouxlaux naeuz, byukbid ginggvaq gyagoeng ndei le, ndaej dawz daeuj yw buqsiengfung、rwz ok nong, ndigah miz vunz cienmonz daeuj soucawx. Baenzneix, dou lai miz di ngaenz ndeu cuengq youq ndaw daeh. Gyanghaet romhriq, gyoengqvunz daj ndaw fangzhwnz loq ndiusingj, dou dingq duzbid hemqswenj, dou caij gvaq raemxraiz, riuj aen lamz iq ndeu, gaemdawz diuzsaux samseiq mij raez, couh bae ndaw ndoeng gip byuk duzbid. Gvaq mbouj geij ngoenz, dou couh dingqnyi miz vunz daeuj ra cawx byuk duzbid. Seizhaenx, dou doq buet okbae heuh de haeuj ranz daeuj, hag vunzlaux caeuq de gangj gyaqcienz. Doeklaeng, vuenh ndaej gij ngaenz haenx deng dou cawx gijgwn ma oet roengz dungx bae lo.

Ngoenz bae ndwen ma, faenh mizyinx dingq bid swenj、gaeb duzbid、gai byukbid gaenq bienq damh haujlai. Ngoenzhaenx, gou youh dauq daengz mbanjranz, mbanjranz gaenq mbwn fan deih byonj. Benq ndoeng raeblaeng ranzgaeuq, gaenq hwnj baenz dab baenz dab ranzlaeuz, gou ndwn youq giz dieggaeuq cungmuenx singriu haenx, youh dingq ndaej nyi geij sing bid hemqswenj. Youq ndaw sing bid hemqswenj, seiznyez youh dauqcungz ndonj haeuj ndaw simdaeuz gou bae lo.