Cunghyih nyinhnaeuz, dangznding singq raeuj、feih diemz, gwn de ndaej ik heiq bouj lwed、 cangq dungx raeuj dungx、dingz in、vued lwed vaq cwk. Bouxlaux sup haeuj gak cungj veizlieng yenzsu caeuq veizswnghsu cugciemh gemjsiuj lo, bingzseiz aeu daj ndaw gwnndoet daeuj bouj sup aeu cij ndaej veizciz cingqciengz daise goengnaengz, doiceiz nyieglaux. Ndigah, conhgyah genyi naeuz, mwh bouxlaux gwn dangz seiz, wng senj gwn dangznding haemq ndei.

Gwn dangznding fuengfap gig lai, ndaej dwk raetngaenz、gaeujgij、makcauj nding roxnaeuz caeuq duhnding itheij cawj gwn, yienghneix ndaej leih raemx leih nyouh; dwk noh maknganx、raemxhing caez cawj gwn, ndaej bouj ndaw bouj lwed; caeuq lwgmaenz、raemxhing itheij cawj gwn, mboujdanh ndaej ciengx ndang, caemh dwg cungj diemjsim ndei gwn he.

Hoeng, dangznding bingq mbouj dwg vunzvunz gwn ndaej. Cunghyih nyinhnaeuz, dangznding dwg singq raeuj, hab boux ndang hawcaep lau nit gwn. Linghvaih, boux veisonh sang caeuq boux baenz dungx in naeuhlanh、boux baenz dungx biux naeuh yinxhwnj baenz dungx in nem boux baenz binghnyouhdangz mbouj ndaej gwn.