Boh Daeg lungz daj ranzcoj lajmbanj ma daengz ndawsingz, gaenq dwg haeujhaemh lo, gyangmbwn mokmumu, gak cungj gak yiengh saek daeng yaepmyebmyeb.

Loh gvaq aen bouq gai gim ndeu, Bohlungz dingz din roengzdaeuj, de lawq yaep he, cij byaij haeuj ndaw bouq bae. De heuh dah gai huq dawz diuz lienhhoz he daeuj yawjyawj, diuz lienhhoz youq gyang fwngz de caemciek bae caemciek dauq.

Diuz lienhhoz neix gig habhoz mehyah de, gaenq miz geij baez yaek hai ngaenz cawx lo, danhseih cungj deng mehyah lienz yaeuh daiq lanz mbouj gamj cawx. Daengzlaeng Bohlungz haebhaeb heuj, dauqdaej mbon cienz okdaeuj cawx lo.

Bohlungz gwih aen mozdozceh ndeu, van haeuj ndaw siujgih bae, dingz ci suj ndei mozdozceh le, vaiqdangq hwnj laeuz bae, baez yamq haeuj dou couh naeuz: “Gou ma lo.”

Mehlungz daenj buhninz naengh aen daengqgeg he youq gyangding, de itmienh saeg buh itmienh yawj densi, laeng cienq coh dou, gij byoem raezrwg ndaemndongq de sanq hoemq youq gwnz mbaq, yawj ndaej rox de ngamq fou gyaeuj gvaq. De ngeux gyaeuj dauqlaeng lez yawj Bohlungz mbat he, mbouj guhsing, song da gig vaiq couh senj daengz densi bingzmu bae. Bohlungz vuenh ndei haiz le couh byaij haeuj diengzhaex bae.

Yaep he, Bohlungz hix daenj buhninz ok diengzhaex daeuj, de buen aen daengqgeg he naengh youq henzndang Mehlungz, de mbouj yawj densi, dinghdingh cim coh naj Mehlungz.

“Naj gou uq maz lwi?” Mehlungz cam.

Bohlungz mbouj guhsing, menhmenh mbon ok aen hab iq cang lienhhoz haenx, siujsim yupyup dwk dajhai.

Mehlungz da baez rongh: “Mwngz cawx ha?” Song fwngz saeg buh de doq fwt dingz roengzdaeuj.

“Mingz rox mingz cam.” Bohlungz naeuz.

“Ngoenzneix raen duzgaeq ok nyouh baez he lo.”

“Dak” Bohlungz bak gangj sing he, canggyaj hozndat. Mehlungz raen le couh riunyum mbouj gangj lo.

“Gou bang mwngz raek ba?” Bohlungz naeuz.

“Cuengq gizhaenx gonq, saeg buh sat le, gou gag raek.” Lwgda Mehlungz cim coh gwnz cazgih.

Mehlungz laebdaeb saeg buh. Bohlungz cungj cim coh fwngz mehyah, yiengh de gig haeujsim.

“Saeg buh miz maz ndei yawj?” Mehlungz cam.

Bohlungz mbouj guhsing, lij dwg cim fwngz mehyah.

“Fatbag luba?” Mehlungz naeuz.

“Mwngz lij geiq ndaej Dahgvei ranzcoj lajmbanj lwi?” Bohlungz naeuz.

Mehlungz mbouj gangjvah, laebdaeb ngoem gyaeuj saeg buh.

“De dai lo. Dingqgangj dwg naiqbaeg dai bw, caen hojsik ha, ngamq 40 bi vunz.” Bohlungz naeuz.

Mehlungz mbouj gangjvah, song fwngz de dingz yaep he youh laebdaeb saeg buh.

“Gou mbouj hawj mwngz guh baenzlai sinhoj, raeuz aeu insik moix ngoenz, moix gienh saeh aeu yawj ndaej hai.” Bohlungz doq gangj doq lumh byoem mehyah, dawz byoem cumh le youh cuengq, cuengq le youh cumh.

Mehlungz mbouj gangjvah, lez yawj Bohlungz da he.

“Gou aeu sim’in mwngz, gou aeu ndeindei doiq mwngz ndei, gou mbouj hawj mwngz souh hoj.” Bohlungz got mbaq mehyah, cup byoem mehyah.

“Guh gijmaz?” Mehlungz yungh gencueg bae nyoengx Bohlungz, hoeng, de mbouj swt, gag guh faenh de.

“Gou lau mwngz biq bae.” Bohlungz naeuz, de nyaenj mbaq mehyah, nyaenj dwk nyaenj dwk, couh dawz mehyah got haeuj rungj daeuj, cup goekrwz mehyah. “Gou yaek hawj mwngz haisim.”

Gangj saedvah, songde gaenq haujlai nanz mbouj doxcup lo, seizneix bouxgvan fwt yiengh- neix, mehbaj hix gamjdaengz gig maqmuengh……

Mehlungz ngiengx gyaeuj cim coh de, de hix haeujsim dwk cim coh naj mehyah.

Fouqda mehbaj yaek laep mbouj laep, ndang unqniegnieg.

Bohlungz cup bak mehyah, naeuz: “Gou hawj mwngz simvuen.”

Mehyah song fwngz got ndoenjhoz Bohlungz, naeuz: “Umj gou haeuj rug bae.”

“Gij binghgaeuq meh gou youh fat lo, gou siengj ngoenzcog ciep de daeuj neix caeuq raeuz youq mboengq he.” Bohlungz naeuz.

Mehyah mbouj guhsing.

“Couh ndwen ndeu.” Bohlungz naeuz.

Mehyah lij mbouj guhsing.

“Couh song aen singhgiz.” Bohlungz naeuz.

“Deuz!” Mehyah hat naeuz.

De fwt cuengq mehyah.

“Yahcienh!” Bohlungz naeuz.

“Vunzhuk!” Mehyah naeuz, de rieg ndei buhvaq, gyaeuj hix mbouj ngeux dauqlaeng doq okdou dauqbae ranzcoj lajmbanj lo.