Cunghyih nyinhnaeuz, lwgbiek singq diemz、manh、bingz, ndaej gej doeg、sanq giet、siu naet. Yienhdaih yozlij yenzgiu byaujmingz, lwgbiek hamz mba、danbwzciz、gvangvuzciz caeuq veizswnghsu lai, gwn de ndaej bouj ik.

Cuk lwgbiek. Cuk lwgbiek hab boux dungx haw、boux dungxraeng gwn. Aeu 50 gwz lwgbiek, 100 gwz haeuxsan, di begdangz he. Dat naeng lwgbiek le ronq baenz gaiq iq; swiq haeuxsan seuq caez dwk rek gya habliengh raemx cawj cuk, cuk yaek cug seiz dwk begdangz diuzfeih couh ndaej. Ngoenz gwn fuk ndeu, laebdaeb gwn 3 daengz 5 ngoenz guh aen liuzcwngz he. Ndaej cangq dungx、siu cwk.

Cuk lwgbiek haijdai. Cungj cuk neix hab bouxcoz gyazcangsen gawh hung gwn. Aeu 50 gwz lwgbiek, haijdai caeuq haeuxsan gak 100 gwz, liuh diuzfeih di he. Swiq haijdai seuq ronq mienz; dat naeng lwgbiek ndei ronq baenz gaiq iq; swiq haeuxsan cingh, sam yiengh caez dwk rek gya raemx cawj cuk, cuk yaek cug seiz dwk diuzliuh caiq cawj goenj song baez couh ndaej gwn. Ngoenz gwn fuk ndeu, 7 ngoenz guh aen liuzcwngz he, laebdaeb gwn 3 daengz 5 aen liuzcwngz.

Cuk lwgbiek haeuxcid. Cungj cuk neix hab mehmbwk daiqndang sim fanz、dai doengh mbouj onj gwn. Aeu 50 gwz lwgbiek, 100 gwz haeuxcid, di begdangz he. Dat naeng lwgbiek ndei ronq baenz gaiq iq; swiq haeuxcid cingh caez dwk rek gya raemx cawj cuk, cuk yaek cug seiz dwk begdangz diuzfeih couh baenz gwn. Ngoenz gwn fuk ndeu, laebdaeb gwn 3 daengz 5 ngoenz guh aen liuzcwngz he.