Seizhah mbwn ndat, ok rog hozdung seiz vunz ok hanh lai, youqgaenj seiz ndang rox hawduet. Caengz okdou gaxgonq gwn aen gyoijhom ndeu, ndaej vanjgaij cungj cingzgvang neix.

Seizhah gamjdaengz ndang nyieg ciengz caeuq noix gyaz mizgven. Aenvih seizhah ok hanh lai, gyaz ndaw ndang yungzheih saet bae, cauhbaenz lwed noix gyaz, ciengz hawj vunz gamjdaengz baeg、genga naetnaiq、amqbak mbouj ndei、aek ciengq, wng lai gwn di doxgaiq hamz gyaz he. Gyoijhom hamz gyaz lai, gwn gyoijhom ndaej bouj gyaz. Cunghyih nyinhnaeuz, gyoijhom singq caep feih diemz, ndaej siu ndat gaij doeg, dwg meih yw ndei ndeu.

Gyoijhom lij ndaej vaiqvet boujcung naengzliengh, gij dangz de gig vaiq ndaej cienjvaq baenz dangzmakit, sikhaek deng ndang vunz supsou. Gij meij ndaw gyoijhom lij ndaej siucawz naet- naiq dem.

Gyoijhom yienznaeuz ndei gwn, danhseih mbouj dwg naeuz vunzvunz hab gwn. De hamz gyaz lai, danhfanz boux baenz gip menhsingq sinyenz、mak goeng- naengz mbouj caez haenx cungj mbouj ndaej gwn lai, itbuen gwn buenq aen couh ndaej; gyoijhom singq caep, boux baenz dungx hawcaep aeu siujsim gwn, mienxndaej baenz dungxsiq; boux baenz binghnyouhdangz hix mbouj ndaej gwn lai, mienxndaej hezdangz swng sang.