De lij diemjcaz le aen Giuz Denzyangz hwnj dwk haenx, ciepraen gij vunzgaemhong youq Denzyangz、Denzdungh capbing haenx, caemh- caiq caeuq gyoengqde doxging gij vwndiz mizgven bwhhoenx. Youh bae Daibingz、Denhmaj daengj diegbya Vujmingz ngonzcaz hong bwhhoenx. Dauqma daengz Namzningz le, de doq hemqcomz mizgven bumwnz ngeixyaeng fuengzmbwn soqsanq caeuq coihguh aen sojcijveih goekdaej swcigih gij vwndiz neix.

Vihliux baujhoh vunzmingh caeuq caizcanj lwgminz, bi 1965 donh laj bi, Swcigih Dangjveij、Cwngfuj haucau bing minz daengx gih, sikhaek hengzdoengh hwnjdaeuj, youq gij cwngcwz siuj yungh ngaenz lai banh saeh haenx lajde, leihyungh gij diuzgen mizleih mbwndieg gag miz haenx, cingleix conghgamj, coihguh conghfuengzmbwn, yiengh- neix daeuj fuengzre feihgih Meijgoz daeuj caeghoenx. Doengzseiz, iugouz gij gihgvanh、hagdangz、yihyen caeuq giyez cangjgvangq haenx caenhcaeux genj ndei gij dieg soqsanq, ciuq yiengh soqsanq geizcaeux、yiengh soqsanq gaenjgip、yiengh soqsanq yaek hoenx haenx sam cungj fueng- anq bae guh ndei giva. Gij doxgaiq ndawsingz, aeu youq baujcingq swnghcanj、baujcingq bing’aeu、baujcingq gunghawj gij cenzdiz lajde, miz giva guh soqsanq, caemhcaiq caijyungh gaemdawz haeuj huq, daezgonq ok huq, noix comz rom, lai cuengq youq danvih caengzgoek caeuq ciuq giva daezgonq gunghawj gij fuengfap neix, caenhliengh gemjnoix doxgaiq gvaqbouh comz rom youq ndaw singz.

Youq soujfuj Namzningz、diegh- enz Namzningz caeuq gij dieg “sam sienq”, cungj hwnj miz gij sojcijveij bietaeu caeuq gij sezbei doengsaenq habwngq daengj sezsih boiqdauq. Aen Cinghsanh Cijveihsoj vunzlai sug haenx, couhdwg youq mwhhaenx guh baenz. Mwh hongbing yaek aeu senj ok Namzningz haenx, yamq daih’it cix doiq daengz gyawz, cijveijsoj guh youq gyawz, yamq daihngeih doiq daengz gyawz, cijveihsoj guhlawz baijbouh, gijneix, Veiz Gozcingh caeuq gij goengdaeuz ginhcwng swcigih haenx cungj nyinhcaen ngeixyaeng gvaq, caemh- caiq roengzfwngz bae guh gij baijbouh maenhsaed.

(caengz sat)