“Gwn ndaej yiengh ceiq haemz, rox guh vunz ceiq ak.” Coenzvah neix dwg seiziq youq hagdangz doegsaw lauxsae couh son dou.

Seizhaenx doegsaw noix ginglig feuh, dou mbouj daiq rox doengh gij eiqsei coenz vah neix ndawde miz geijlai laeg, hoeng dou cungj nyinhcaen dingq gij vah lauxsae son’gyauq, dawz coenz vah neix geiq haeuj sim haeuj hoz maenhmaenh bae.

Doenghngoenz cuengqhag ma ranz, gou maij dawz doengh gij saeh sonhag ndaw hagdangz lwnh hawj daxmeh nyi, moix baez dawz coenz vah lauxsae son neix gangj hawj daxmeh nyi, daxmeh cungj dwg naj saepsatsat dwk dauqngeix gij ndwenngoenz doenghbaez. Doenghbaez seizneix, daxmeh couh daj aen seizdaih Mauz cujsiz daiq bing hoenx vunzdig gangj daengz de caeuq daxboh baenzlawz dawz dou caet bet beixnuengx rungx hung baenz vunz; daj seizgonq gwn mbouj imq daenj mbouj raeuj gangj daengz ranz gou doenghbaez moix bi ndwen seiq gij ndwenngoenz laepngaungau daengx ranz gwn le donq gwnz ra donq laj, gangj daengz ciuh gyoengqde cungj saedceij bae ra byaekngaih byaekcwx haenx. Gangj daengz giz haemzhoj, daxmeh ndaw da raemxda giengx rim gvaengxda, sawrikrik yaek aeu ndik okdaeuj; gangj daengz dou bouxboux cungj majhung ndang cangcwtcwt, daxmeh hix nyaenx mbouj ndaej naj riu sim hai……

Seizneix ndwen seiq youh yaek daeuj daengz lo, henz loh bangx suen, gwnz ndoi laj bya, din reih gyaeuj naz, doenghgo byaekcwx cungj biu ok gij nyod oiqwtwt daeuj lo. Daengngoenz raeujrub baez ciuq, gij mbaw heuswdswd, heu ndaej fat rongh lwenq da, yawj ndaej vunz myaiz rihlili.

Ngoenzneix ndaej hoengq dou bae hawj megsuek dwk bwnh, gij byaekcwx henz reih baenz nyumq baenz nyumq, oiqwtwt, youzywdywd. Banhaemh dauqranz, dou mbaet ndaej loz byaekcwx ndeu dauqma ndeidnei cimz can ndeu. Gij byaekcwz neix heuswdswd, ngamq swiq seuq cang haeuj swxbyaek, couh yawj ndaej gou ndwnj myaiz byoegbyoeg. Caj daxmeh cawj ndei dawz hwnj daiz, gou muengzfoegfoeg dwk aj dawh couh nep haeuj bak bae. Va! Haemz haeuj heuj haeuj faenz, ngamq nyaij di ndeu, haemz ndaej gou laep da nyaeuq najbyak……

Dahlan hung raen gou byaek baez hwnj daiz couh coemj bae nep gwn, laihnaeuz dwg maz byaek ndeigwn, de hix dawz dawh hwnjdaeuj nep le nep ndeu oet haeuj bak bae, cij raen de ngamq dawz byaek oet daengz bien bak, de aeu ndaeng nyouqnyouq, nyaeuq bwn’da dwk …… Hoeng “duzmeuz ngah” de youh nyaenx mbouj ndaej bae cimzcimz, byaek ngamq soengq haeuj bak, de youh sikhaek haiz okdaeuj, mienh haiz byaek mienh hemq naeuz: “Neix dwg byaek gijmaz ha, baenzneix haemz, yienghlawz gwn ndaej?” De iet linx raezrangrang bae, doq biq myaiz doq daejnganga naeuz haemz lailai.

Gou nyaeuq le nyaeuq najbyak, youh nyaij geij baez, ndwnj gaemz byaek le youh caiq nyaij gaemz daihngeih…… Yienghneix gwn le geij gaemz, roxnyinh gij haemz ndaw bak, bienq baenz ngaungauq van’gom, yied gwn ndaw bak yied gom, gom ndaej hawj gou simsangj dangqmaz.

Cij raen daxmeh menhmenh nyaij gaemz byaek ndaw bak, najbyak nyaeuq cungj mbouj nyaeuq dwk baez sot couh dawz gaemz byaek ndwnj roengz dungx bae lo. Gou caeuq dahlan cungj daengx hung song da yawj dwk daxmeh. Daxmeh yawj dahlan da ndeu, youh yawj gou, sing unq cingz laeg dwk doiq dou naeuz: “Sou gaej yawj gij byaekcwx neix haemz lai hoj gwn, de dwg haemz gonq gom laeng, neix cix dwg gij feih ndwenngoenz raeuz ha! Cungj byaekcwx neix gag biu gag maj, mbouj dwk gvaq nungzyoz, mbouj coq gvaq vafeiz, vunz gwn le gaij iek youh ndangcangq. Gaxgonq gyoengq bouxlaux bae hoenxciengq, mbouj miz ngaiz gwn, seiz dungx iek cungj dwg gwn doenghgo byaekcwx maj youq gwnz ndoi laj doengh neix, bouxboux ndangcangq rengz cuk, mboujne baenzlawz ndaej dawz vunzdig gyaep ok rog guek bae. Mbouj gwn ndaej haemz, gom rox daj gizlawz daeuj ha?”

Dingq gij vah daxmeh, gou naemj hwnj ndwen gonq gienhsaeh ndeu: Hagdangz hong lai, saeh hung saeh iq heux baenz aenndang, nyungqnyatnyat, ra mbouj raen gyaeuj hix veq mbouj raen ngwenz, gou ngoenzngoenz nyaengq ndaej lumj aengyangq nei mbouj dingz dwk baenqlulu, vihliux daezsang gij sonhag naengzlig swhgeij, gou mbouj ndaej mbouj leihyungh banhaemh seizgan daeuj gyaban beigo, guh gogen. Ndwen gonq yaek camgya veihgo doxdax seiz, banhhaemh baez cuengqhag, gou couh moekgyaeuj bae guh gogen, loeg veihgo, lumz bae mbwn rongh mbwn laep, lumz bae dungx iek ndang naet, guh ndaej da gaemhsaesae hix sij mboujndaej bae ninz. Yienghneix guh le cib geij haemh, veihgo cungjsuenq guh ndei lo, vunz hix byom bae geij gaen. Bingzciengj gezgoj baez okdaeuj, roxdaengz aen veihgo gou ndaej daengz daengx guek it daengjciengj, gou ndaw sim dwg geijlai vuenheij ha. Couh dwg aenvih gou naengz gwn roengz gij haemz gij hoj guh veihgo haenx, cix ndaej daengz gij mingzdaeuz hungmbwk ngoenzneix.

Seizneix gou rox, ciuh vunz raezrangrang, mbouj miz byawz byaij ndaej onjwtwt, swnhriri, gwnz loh miz haemz miz hoj miz gumzgamz, miz riu miz daej miz vuenyungz, raeuz aeu gwn ndaej gij haemzhoj neix roengzbae, diuz loh baihnaj couh yied byaij yied soh, yied byaij yied bingz, hix yied daeuj raen gij rongh lwenqda lo.

“Gwn ndaej yiengh ceiq haemz, rox guh vunz ceiq ak”. Gou aeu dawz coenz vah neix daengqlwnh gyoengq lwg gyoengq lan, hawj gyoengqde hix aeu geiq maenh coenz vah, caemhcaiq ciuq coenz vah neix bae guh, dawz diuz loh seiqvunz byaij ndaej onjwtwt, swnhriri.