●6 nyied 20 hauh, Cenzcouh Yen youq Dahvanyanghhoz gawjbanh ruzlungz doxdax, 13 aen ruzlungz youq duenh dah soh 1000 mij raez de beij vaiq, yienhciengz gig nauhyied, ciengz- mienh gig ndeiyawj, yinx le haujlai vunz ndawsingz nem hekyouz daeuj yawj.

（Vangz Swhcang）

●Daj bineix daeuj, Nazboh Yen Minzcuzgiz cungfaen leihyungh gak dieg guh minzcuz cietgingq hozdung, guh ndei hong senhconz gyauyuz minzcuz cwngcwz dangj raeuz、minzcuz faplwd fazgveih nem gij vahgangj youqgaenj gvendaengz Siz Ginbingz gangj hong minzcuz. Daengz dangqnaj, gaenq ok vunz 75 vunzbaez, ci 15 gyaqbaez, venj fukvang 15 diuz, diep senhconz byauhyij 350 mbaw, fat senhconz swhliu 7300 mbaw, senhconz soujcwz 7500 bonj, hai codanzvei 10 baez.

(Liengz Beizcuh)

● 6 nyied 19 hauh daengz 20 hauh, Lungzswng Gak Cuz Swciyen gawjbanh ruzlungz doxdax, 26 aen ruzlungz youq Dahsanghgyangh beij vaiq, gyoengqde daj gih raeuz nem Huznanz Swngj gungh 8 aen yienh daeuj. Doxdax yienhciengz gyong yiengjdumdum, ndeiyawj raixcaix, haujlai vunz daeuj ngonzyawj.

(Veiz Gizyangz Banh Ciyangz)

●Daj guh aen hozdung“Denhdwngj gyaeundei·lajmbanj swnghdai”daeuj, Denhdwngj Yen 124 aen cunh cienzbouh doeng roensuijniz roxnaeuz roenbwzyouz, 13 aen yangh (cin) gihbwnj doeng ngeih gaep goengloh, 780 aen mbanj doeng roensuijniz, roen ndaw mbanj miz 50% bu suijniz gvaq.

(Vangz Lilanz)

●Gaenh bi daeuj, Lingzyinz Yen ciuq dieg dajsuenq, gujli vunzlai dajndaem cungj mak maenhndei heuhguh makmaenjsimvaiz. Seizneix daengx yienh ndaem cungj mak neix 1.8 fanh moux, dawzmak 5000 lai moux. Dangqnaj gak yanghcin vunzlai cungj nyaengq mbaet mak bae gai. Seizneix moix goenggaen gai ndaej 35 maenz.

(Siuh Fazlingz)