Seizhah mbwn ndataeng, gwn vanj dangduhheu ndeu vunz couh gamjdaengz liengzsangj haujlai. Neix dwg aenvih, ndaw duhheu hamz miz daihliengh anhgihsonh、suh’anhsonh、gai、diet、linz daengj doxgaiq, ndaej boujcung gij yingz- yangj youq mwh sup haeuj caeuq baiz ok seiz sied bae haenx. Hoeng, mbangj vunz mbouj liujgaij aenndang swhgeij baenzlawz yiengh, cix luenh dawz dangduhheu dangguh raemxgoenj daeuj gwn.

Raeuz rox, dangduhheu yienz- naeuz ndaej siu hwngq ik heiq、nyinh conghhoz gaij hozhawq, hoeng geij cungj vunz lajneix mbouj hab gwn:

1、Boux ndang gyoetliengz (lumj genga gyoet、hwet din gyoet in、dungxsiq haex saw daengj), gwn le dauqfanj hawj bingh gya’naek, caemhcaiq yinxfat baenz cungj bingh wnq dem.

2、Bouxlaux、lwgnyez、boux ndang hawnyieg mbouj hab gwn, aenvih danbwzciz ndaw duhheu beij nohgaeq lij lai, geij cungj vunz neix goengnaengz siuvaq dungxsaej haemq nyieg, yaepyet seizgan nanz siuvaq gij danbwz ndaw duhheu bae, yungzheih aenvih dungxraeng yinxhwnj baenz dungxsiq.

3、Gij vunz cingq gwn yw hix mbouj hab gwn, neix dwg aenvih, gij goekgaen gejdoeg duhheu dwg youq laeng danbwz duhheu daengj cwngzfwn caeuq youjgihlinz、cung- ginhsuz giethaeb baenz gij huq yaemz. Danhseih, gij gejdoeg cwngzfwn neix hix rox caeuq gij cwngzfwn yw hwnj fanjying le hawj ywyauq doekdaemq.