Bonjbauq siusik (gicej Veiz Yennaz/韦愿娜) 6 nyied 13 hauh, 300 lai boux beixnuengx Mauz- nanzcuz youq Nanzningz guhhong、swnghhoz haenx doxcomz youq Gvangjsih Minzcuz Vwnzvuzyen guh hozdung, angqhoh Ciet baenlungz Mauznanzcuz.

Ciet baenlungz dwg aen ciet conzdungj Mauznanzcuz gouz saenz baujyouh ndaej fungsou ndeu. Gvaq ciet ngoenzde, ranzranz guh haeux- naengj haj saek caeuq nohnaengj, gaj mouseiq, bouxlaux lwgnyez daenj buhmoq vaqmoq, dawz haeuxnaengj nohnaengj bae gyaeujreih gyaeujnaz caeq boux singq Nungz, gouz rumz swnh fwn cuk, haeux ndaej fungsou; gyoengq vunzmbanj lij gaj cwz bae ndaw miuh caeq Goengsamgyaiq, gouzmuengh vunz- ranz bingzan. Ciet baenlungz hix dwg ngoenz bouxcoz saimbwk Mauznanzcuz doxcomz eu fwen guhyoux. Seizneix, Ciet baenlungz Mauznanzcuz gaenq dwg gih raeuz cib aen ciet vwnzva binjbaiz hung ndawde aen ndeu.

Guh hozdung ngoenzde, gyoengq beixnuengx Mauznanzcuz ciengq “beijgien”, diuq foux “feizdauq” caeuq foux “vadingjgaj”, baijyienh le gij gwndaenj vuenyungz lwgminz Mauznanzcuz, ndeiyawj dangqmaz.

Vanzgyangh Mauznanzcuz Swciyen Cwnghez fucujsiz Danz Gungjsunh youq gwnz hoih hozdung naeuz: “Ngoenzneix, raeuz youq Nanzningz angqhoh Ciet baenlungz, dwg dauqngeix Goengsamgyaiq, hungzyangz minzcuz vwnzva, hawj aen ciet geq neix fatok gij rongh seizdaih moq. Gyoengq bouxcoz aeu haenqrengz guh saeh, haengjheiq roengzrengz gensez mbanjranz, vih gensez ndei mbanjranz、saedyied aen siengjmuengh Cungguek hungmbwk haenx ok faenh rengz swhgeij.”