De naeuz, hoenx ciengq le diuz roen neix youh boih youh ancienz, ndaej doxlienz diegnaj dieglaeng gyaudoeng dajyinh, seiz hozbingz doiq mbefat diegbya baihsaebaek Guengjsae caemh miz bietaeu raixcaix. De caeuq gij goengdaeuz ndaw gih wnq, lai baez diemjcaz hong guh diuz roen neix, gipseiz gaijgez gak cungj gannanz guh roen. Namzningz doeng coh Baksaek diuz roen haenx, yaek doeng gvaq Gauhfungh’au, danghnaeuz vunzdig caq aengemh neix nei, soujfuj doeng coh baihsae gij roen haenx cix gaz lo. Ciuq gij yigen de, swcigih gaenjgip guh diuz goengloh reguek daj Namzningz Si Sihyanghdangz lohgvaq Vujmingz Ningzvuj ndeu okdaeuj, caeuq diuz roen Namzningz daengz Baekging haenx doxlienz hwnjdaeuj. Gij goengloh reguek seizde guh haenx, miz mbangj duenhloh daegbied demgvangq demmaenh, vihliux fueng- bienh gvaqlaeng gij feihgih budui hwnjroengz. Gij goengloh Byacwx caemh dwg seizhaenx guh baenz. Veiz Gozcingh naeuz, danghnaeuz hoenx ciengq, Byacwx diegneix haeuj ndaej gung, doiq ndaej souj, miz goengloh le, daengzcog ndaej guh baenz aen diegngonzyouz ndeu. 7 aen yienh henzbien (si) caeuq Yeznanz dox- rangh haenx, dingzlai dwg diegbya, gyaudoeng mbouj ndei, gij neix mboujdanh yiemzcungq gaz ginghci fazcanj, caemhcaiq gig mbouj ndei reguek. Daegbied dwg Cibfanh Byahung、Byabouxmeh caeuq gij dieg bienre Bwzbuvanh, diegseiq yung- yiemj raixcaix, dwg gij dieg youqgaenj vunzdig mbwndouz caeuq caegdoh hwnj haenz haenx. Veiz Gozcingh naeuz, gij hong reguek gig muengh guh ndei gij gyaudoeng geij aen dieg neix haenx. Swcigih cix laemxsim haenq, gyaqvaiq suzdu caep roen diegrebien haenx, cij geij bi couh hawj gij goengloh daengx aen diegrebien haenx gihbwnj mbefat baenz aen muengx gyaudoeng ndeu.

Youq duenh neix, guekgya buet le bae cidaenzroen、cidoinamh、cigunghcwngz、cicanjyinh daengj gih- gai coih roen haenx hawj Guengjsae coih gij roen bwhhoenx, lij baij le bang vunzcaihhangz caeuq yaek fanh boux vunzhong caeuq song aen bingduenz daeuj guh hong. Ginggvaq haemzhoj haenqguh, daj bi 1965 daengz bi 1970, Guengjsae gyonj guh baenz roen bwhhoenx caeuq giuzhung 146 aen hanghmoeg, roen raez 1657 goengleix, siumied baksok goengloh 23 giz, hwnjguh caeuq gaijguh aengiuz goengloh 20 aen, gaijcauh aengiuz yungyiemj 256 aen. Gijneix doiq dubmaenh fuengzre diegbien baih- namz guek raeuz, bang Yeznanz dingjhoenx Meijgoz, coicaenh song fueng hwnjguh ginghci, cungj miz gij yiyi youqgaenj raixcaix haenx.

(caengz sat)