Ndwen lai daeuj, gou itcig cungj gvaqniemh ndaek “rinbohlwg” lumj- liuxliux、 sawj vunz ngeixlaeg ngeix- gyae haenx.

Bineix ngoenzciet “Sam Nyied San” aen gih raeuz cuengqgyaj geizgan, gou caeuq baengzyoux guhdoih bae Gvangjdungh Swngj Fozsanh Si Daliz Cin guhcaemz. Gizde miz aen gingjdiemj ndeu heuhguh “Nanzgoz Dauzyenz”, miz haujlaiq gingjsaek gyaeundei, hawj gou geiq ndaej ceiq laeg de dwg ndaek rin yienghceij geizheih ndeu. De youz song aen bouhfaenh habbaenz. Baihswix beij baihgvaz hung. Daj gyae yawj bae, ndaek rin neix couh lumj bouxlaux swzsienh umj boux lwgnyez youq ndaw rungj nei.

Vunz bonjdieg lwnh raeuz: “Yienzlaiz ndaek rin neix baihswix beij seizneix hung lai lo, hoeng ciengznienz deng rumz ci fwn daj, seizgan nanz le, couh menhmenh bienq iq haujlai lo. Hoeng baihgvaz de cix mbouj gemjnoix saekdi, lij hung lumj codaeuz. Aenvih ndaek rin neix mbiengjswix lumj daxboh, mbiengjgvaz lumj lwgnyez, “daxboh” cingq caenhsim baujhoh “lwgnyez”, bohgyaez fouzsei, hawj vunz gamjdoengh, sojlaiz gyoengqvun heuh de guh “rinbohlwg”.

Seizde, gou nyaenx mbouj ndaej siengj daengz boh gou, daj iq daengz hung, de hix lumj “rinboh” baujhoh “rinlwg” nei, caenhsim caenhrengz gyaezhoh gou. Geiq ndaej gou doeg gauhcungh ngeih nienzgaep bi haenx, aenvih gyanghaemh yaek hwnjdangz, cungj dwg daengz gig haemh cij ndaej cuengqhag. Daxboh simyou gou mbouj ancienz, couh moix haemh caeuxcaeux couh daeuj daengz yozyau caj gou cuengqhag, ciep gou ma ranz, itcig genhciz le bi ndeu, fwnrumz mbouj gaij.

Miz haemh ndeu, gou youq ndaw gyausiz hwnjdangz, yawj rog cueng, cij raen gwnzmbwn laepcupcup, fwj- ndaem lumj yaek nem gwnz dieg ityiengh. Gofaex deng rumzhung bongj ndaej doeng laemx sae ngeng lo. Yaep ndeu, mbwn couh doek fwn hung lo, ndik raemxfwn hung lumj naed duh nei, daj gwnz cuengbohliz, “bili bala” yiengj mbouj dingz.

Fwn itcig doeksasa, daengz roengzdangz lo hix mbouj dingz. Gou gang liengj byaij ok bakdou yozyau, sibgvenq dwk byaij coh baihswix bakdou yozyau go faexrenh haenx —— daxboh bingzciengz couh dwg youq gizde caj gou. Dang gou byaij daengz laj gofaex seiz, cix mbouj raen daxboh. Gou saetmuengh youh simgip yawj bae yawj dauq, maqmuengh daxboh vaiqdi daeuj ciep gou. Hoeng, buenq diemjcung gvaqbae lo, lij mbouj raen daxboh. Seizhaenx fwn yied doek yied hung. Gou siengj, aiq dwg fwn doek hung lai, daxboh mbouj daeuj lo. Ndigah, gou gietdingh gag byaij ma ranz.

Gou ngamq yaek byaij, couh dingqnyi gij sing daxboh: “Dahseiq, Dahseiq, caj gou ……” Gou sikhaek cienq ndang gvaqdaeuj, raen ndaw fwn miz boux vunz ndeu coh gou buet daeuj, de couh dwg daxboh gou. Daxboh raen gou coenz vah daih’it couh gangj: “Gou daengz ceiz lo, mwngz caj nanz lai la?”

Gou naeuz:“Mbouj youqgaenj law, mwngz baenzlawz mbouj gang liengj ha, ndang cungj dumz lo!”

Daxboh riu naeuz:“Dumz couh dumz di lo, mbouj youqgaenj. Aen ci gou deng vaih lo, lij cuengq youq ndaw bouqdajcoih baihnaj hawj saefouh coih ne! Gou lau mwngz caj nanz lai, couh gaenjmuengz buet daeuj, lumz gang liengj lo.”

Daxboh daengx ndang cungj dumz liux, buhvaq nem ndangnoh, gavaq ndeu gienj hwnjdaeuj, gavaq ndeu doek roengzlaj; raemxfwn riengz byoem caxcadcad daxboh rih daengz gwnz naj, de loq haep lwgda hwnjdaeuj, mbouj hawj raemxfwn rih haeuj lwgda bae. Aenvih ngamq buet gvaqdauj, daxboh cungj ngaebcaw yaek dai, baegfofo. Yawjraen daxboh yienghceij diuqgah, gou ndaeng miz di soemj, raemxda gwenxcancan, dangqnaj cungj dwg baenz benq ndiepgyaez daxboh. Daxboh cam gou baenzlawz lo, gou cix riu naeuz: “Mbouj miz maz saeh, daxboh, gou docih mwngz!” Daxboh yawjyawj gou, miz di daejsaekwk, lumjbaenz siengj gangj gijmaz, doeklaeng cix yawj gou haisim dwk riu lo.

Fwen vanzlij gig hung, rumz ci gvaqdaeuj daxboh miz di saenznit, hoeng gou cix roxnyinh raeuj- rubrub —— gij ndiepgyaez raeujrub daxboh cingq duk gou hwnjdaeuj ne! Gwnz seiqgyaiq miz haujlai vunz haenh gij ndiepgyaez daxmeh, hoeng gig noix miz vunz haenhgangj gij ndiepgyaez daxboh. Gizsaed, daxboh caeuq daxmeh doengzyiengh hungmbwk, dan dwg daxboh gij fuengsik gyaez lwg haenx, mbouj yungzheih deng vunz fatyienh. Bohgyaez hung lumj goengqbya, daxboh couh lumj “rinboh” ityiengh, mbouj gangj ndaejsaet, mbouj oksing itcig baujhoh “rinlwg”. Daxboh caenh naengzlig de daeuj ciengx gou gyaez gou. Bohgyaez hix lumj fwncin, ndaej nyinh fanhfaed, cingzeiq naekna ……

Ndaek “rinbohlwg” sawj gou ngeixniemh raixcaix haenx, sawj gou siengj sikhaek bae daengz henz ndang daxboh, yawj de gaeuqgaeuq bae, caiq saeqsim ngeixngeix gij bohgyaez raeujrubrub!