Veiz Gozcingh hoenx gvaq geijcib bi ciengq lo, de gig rox seizhaenx Guengjsae youq sienq daih’it hoenxciengq hongrap gig naek. De lai baez caeuq gij cangzveij dangjveij ndaw gih naeuz, Meij- digozcujyi mbouj gamsim mbouj mied raeuz, Cauzsenj hoenxciengq sat le, gij ruzbing gyoengqde lij hah Lueghaij Daizvanh, capfwngz hongndaw Cungguek, dingjrengz Daizvanh “fanjgung daluz”, seizneix youh yungh hongbing daeuj bangfuz aen cizdonz fanjdoengh baihnamz Yeznanz, caemhcaiq cigsoh haeuj- ciemq baihbaek Yeznanz, hongbing hangzhaep Cungguek. Vihliux re guekcoj, raeuz itdingh yaek dingq- coengz cunghyangh cijveih, bwh ndei gij hong hoenxciengq.

Ciuq Mauz Cwzdungh cujsiz gvendaengz gak swngj cungj aeu miz gunghyez hongbing, bonjfaenh yaek cauh cungqcim、cungqcungfung、cungqgaglienzdwk naek、cungqgag- lienzdwk mbaeu、bauqgyawjdwk、lwgyienz、ywcaq gij cijsi neix, Guengjsae gig vaiq cix youq Hozciz、Baksaek、Yungzsuij daengj diegfueng “sam sienq” (dieglaeng canloz) caeuq gij gunghcangj miz diuzgienh haenx, baijbouh hwnjguh caeuq cauhguh cungqbauq ciengzgvi. Veiz Gozcingh caenndang cam gij saeh hwnjguh binghgunghcangj, caemhcaiq ngonzcaz le Ginhcwngzgyangh Yinzmiz Gih- gaicangj、 Baksaek Davazcangj daengj mbangj ginhgunghcangj, genjcaz gij cizlieng cungqcimgagdoengh、lwg- yienz、soujliuzdan daeng cungqbauq ciengzgvi haenx, gujli vunzhong ceng faen duet miux, vihliux henre guekcoj lai cauh di cungqbauq habgek okdaeuj.

Gyaudoeng dajyinh doiq bwh- hoenx daeuj gangj daegbied youq- yaenj. Ciuq Cunghyangh Ginhveij canloz baijbouh, Veiz Gozcingh youh yungh gij nganxgueng canloz canghhongbing de, gipseiz ngeixyaeng caeuq gviveh le gij hwnjguh goengloh reguek Guengjsae, ndaej cunghyangh baecinj. De lai baez bae ra Swcigih Bwhhoenx Dazyinx Siujcuj caeuq giveij、ginghveij、genveij、caizcwng、gyaudoeng、gunghyez gihgai daengj danvih gij goengdaeuz gyoengqde, baez hangh baez hangh bae gidij roengzmaenh. Ndawde, youz Gveilinz ging diegbya baihsaebaek daengz Cingsih Lungzbangh diuz roen reguek neix, dwg de caeuq Cinz Yinggih gyoeblwnh hawj cunghyangh, ceng ndaej cunghyangh dingjrengz le cix guh ndaej.

(caengz sat)