Mbouj rox baezlawz, mbouj rox miz geijlai ciencien fanhfanh boux hagseng swhfan bizyez haenx lizhai ndaw singz nauhyied, byaij haeuj “ndawrungj” byalaeg. Gou hix dwg ndawde boux ndeu. Gyanghwnz raezrangrang, raeuz nyaenx fwz caeuq gadog, mbouj gouz gijmaz, cij gouz naengz youq ndaw byalaeg caem- rwgrwg neix dingq daengz gij singhung doegsaw lwgnyez, vih hong gyauyuz saehnieb lajmbanj hoenghhwd fazcanj, vihliux fazcanj Cuengh Gun song sawvah gyauyuz lajmbanj raeuz, raeuz vut le swnghhoz baenzmiz ndawsingz. Gyangngoenz, gij singhung doegsaw caeuq singhung eu fwen lwgnyez heuhsingj bya dab bya ninz caemrwgrwg haenx；gyanghwnz ndawbya, duzgoep heuhngopngop, ciengq ok diuzgo lajmbanj, heuh vunz ninzndaek. Byonghhwnz vunz ninz caemrwgrwg, raeuz cij naengz ngiengx gyaeuj yawjmuengh baihrog congh- cueng, geq gij ndaundeiq rim gwnz mbwn haenx, gij rongh ndaundeiq yubyab ciuq haeuj ndaw riep daeuj hausagsag ronghrwgrwg, sawj gyang- hwnz seizhah engqgya caemrwg ancingh. Bi gvaq bi, ngoenz gvaq ngoenz, gyoengq lauxsae hagdangz lajmbanj miz mbangj gaenq gezvwnh senglwg, gvaq gij swnghhoz andingh haenx. Ndwen ndeu, caemhcaiq geij ndwen cij ndaej ok singz bae guhcaemz baez ndeu. Seizcoz raeuz couh yienghneix youq ndaw byalaeg menhmenh siu bae lo.

Seizcoz yungzheih gvaqbae, yienghsiengq yungzheih bienq geq, hoeng gij gouz gyauyuz saehnieb lajmbanj raeuz ciengxlwenx mbouj bienq, daj gyaeuj daengz byai cungj aeu souj ndei gyauyuz saehnieb. Yienznaeuz, gouz haeuj ndawsingz guhhong hawj raeuz doenghsim, raeuz yupyat gvaq、gvaeh gvaq、nyapnyuk gvaq, hix siengj diuq ok ndaw byalaeg daengz ndawsingz bae guhhong. Cig daengz ngoenzneix,《Cungguek Gyauyuz Bau》sinhvwnz bingzlwn ok bienq faenzcieng ndeu, daezmoeg dwg: 《Cawz Liux Vamoq Caeuq Sing Bekfwngz, Raeuz Baenzlawz Docih Lauxsae Lajmbanj》. Yawj le bienq faenzcieng neix, gou gamjdoengh raixcaix. Neix gangjmingz le lauxsae lajmbanj ndaej daengz sevei yawjnaek caeuq haengjdingh, lumjnaeuz diegvih lauxsae lajmbanj raeuz yaepyet ndaej daezswng le haujlai. Neix hawj lauxsae lajmbanj raeuz engq roengzdingh gietsim, aen saenqniemh souj ndei byalaeg engq giendingh lo.

Siengj daengz gaxgonq, lauxsae lajmbanj raeuz souhaeuj daemq cungj cingzgvang neix hawj vunz saejheiq. Dangnaj daengx guek miz cunghyoz caeuq siujyoz lauxsae 1200 fanh lai vunz, youq lajmbanj sonsaw ciemq daih bouhfaenh, gyoengq lauxsae neix ciengzgeiz youq lajmbanj guhhong, gunghcoz diuzgen sinhoj, souhaeuj gig noix, yozliz mbouj sang, siusik bix, fazcanj gihvei noix. Cungj cingzgvang neix gyoengqvunz ciengzgeiz yawj mbouj daengz. Youq ndaw lwgda vunzlai, gangj daengz lauxsae lajmbanj, itcig dwg yienghsiengq mbouj biengzciengz、mbouj lau dwgrengz mbouj lau vunz ienq haenx. Caemhcaiq nyinhnaeuz raeuz okrengz haenx dwg wnggai, lauxsae lajmbanj souhaeuj noix dwg vwndiz doedok ceiq youqgaenq ndeu, ginghci diegvih gietdingh sevei diegvih, sojyij sevei diegvih daemq. Lauxsae lajmbanj ok baihrog bae hagsib gihvei gig noix, miz mbangj hagdangz lajmbanj “gunghcoz mauzdun” gig doedok. Miz mbangj hagdangz lajmbanj seizneix lij dwg aen hagdangz ndeu cij miz boux lauxsae ndeu sonsaw, roxnaeuz boux lauxsae ndeu son geij aen ban cungj cingzgvang neix. Lauxsae gizneix mbouj miz seizgan bae baihrog hagsib, daezsang sonhag naengzlig swhgeij.

Docih gij gezcwz dangjcungh- yangh, guekgya daj 2013 nienz hwnj hawj lauxsae lajmbanj bouj ngaenz- swnghhoz. Linghvaih, lij yungh siusik gisuz gaihcanj vangjloz sonhag. Hawj raeuz naengh youq ndaw ranz hix naengz ndaej rox gyauyuz siusik baihrog, hawj lauxsae lajmbanj raeuz mbouj yungh ok baihrog bae hix naengz miz gihvei dox hagsib、gyauhliuz、gaeudoeng caeuq daez- swng. Gij gietdingh dangjcunghyangh neix, mboujdanh daezswng ginghci diegvih lauxsae lajmbanj, caemhcaiq daezswng hong diegvih lauxsae lajmbanj, engq yienh’ok lingjdauj baihgwnz gvansim caeuq yawjnaek raeuz.

Cien coenz fanh coenz hix gangj mbouj liux gikdoengh ndawsim dou, couh hawj dou yungh diuz go ndeu daeuj gangj ndawsim lauxsae lajmbanj dou ba: “Gizsaed gou mbouj siengj lizhai, gizsaed gou siengj louz roengzdaeuj, louz roengzdaeuj buenx mwngz moix aen cin hah cou doeng, mwngz aeu saenq gou, mbouj yungh geijlai nanz, gou aeu mwngz ciuhneix caeuq gou itheij gvaq.”