Youq seiz “hajseiq” ciet bouxcoz yaek daengz gaxgonq, 4 nyied 24 hauh gyanghaet, ndaw hagdangz Bahmaj Daih’it Siujyoz nauhyied dangqmaz, ngoenzde, Bahmaj Yauzcuz Swciyen Yenveij Senhconzbu、yen dungjcanbu、yen cingsaenz vwnzmingzban caeuq yen gyauyuzgiz daengj danhvei youq ndaw aen hagdangz neix gawjbanh cungh siujyoz hagseng doxdax yenjgyangj、gangj gojgaeq hozdung, doxdax yenjgyangj aeu “haenqrengz doxhwnj, hengz dwz guh ndei” guh cawjdaez. Baez doxdax neix faen cunghyozcuj caeuq siujyozcuj, moix cuj 15 boux hagseng, cunghyozcuj guh doxdax yenjgyangj, siujyozcuj guh doxdax gangj gojgaeq. Gyoengq senjsouj gak boux gag yienj bonjsaeh, bouxboux bak raeuz sing seuq, sim’angq naj riu, cekgangj gij cungyausing hengz dwz guh ndei haenx, sawj gyoengq bouxdingq cingsaenz hoenghhwnj, haengj riengz hagguh, sawj daudwz yisiz gyoengq bouxcoz caeuq lwgnyez ndaej demgiengz. Gingqgvaq haenqrengz doxdax, doeklaeng, Vangz Swhyenz caeuq Cwng Cauzvwnz song boux doengzhag faenbied aeundaej cunghyozcuj caeuq siujyozcuj daih’it mingz.

(Moz Sangvwnz/莫尚文)