Seizhah, vunz yungzheih baenz fatsa, gyahwnj fwn lai caepndat dem, mizleih nonnengz sanj maj, gijgwn yungzheih mwtnaeuh, hawj vunz baenz saej humz、oksiq. Ndigah, seizhah ciengz gwn lwghaemz doiq ndangdaej gig miz leih. Baenzneix, yaek baenzlawz gwn ne?

1、Aeu lwghaemz guh baenz cazliengz, ngoenznaengz ndoetgwn, ndaej siu huj siu hwngq.

2、Aeu lwghaemz ronq baenz gaiq mbang, dwk gyu iep yaep he, caiq dwk noh mienz、gyaeujsuenq、daeuhseih caez cien gwn, saek feih sien ndei.

3、Mwh fatsa fatndat seiz, aeu aen lwghaemz ndeu, daet baenz donh vet sim ok le oet mbawcaz haeujbae fung dauq ndei, venj youq giz doeng rumz langh sauj, moix baez aeu 5 daengz 10 gwz daeuj baek raemx roxnaeuz cimq raemxgoenj dang caz gwn.

4、Mwh hozhawq bak sauj seiz, aeu aen lwghaemz ndeu, buqhai vet sim ok le ronq soiq baek raemx gwn.

5、Baenz gipsingq oksiq seiz, aeu aen lwghaemz ndeu daem yungz le dwk di dangz he gyaux yinz, gvaq song diemj cung nyaenj raemx ok le gwn lwghaemz.