Gou dwg aen doengjnyapnyaj cuengq youq gox bakdou hagdangz mbouj yienhda he, couhcinj nyapnyaj baenzlawz uq gou cungj mbouj yiemz, hoeng gou couhdwg nyaenx mbouj ndaej mbangj doengzhag doiq gou mbouj aeueiq.

Mbwn caengz rongh, daxheiz baetdieg haenx couh daeujdaengz henz ndang gou, baet gou uet gou ndaej seuqsaksak. Gou sim’angq ndwn youq gox bakdou hagdangz, muengh miz gou le ndaej sawj gizneix bienqndaej seuqcengh cingjcaez. Gyoengq doengzhag daeuj hagdangz lo, gou hix wnggai guhhong lo. Gou aj hung aenbak gou, muengh gyoengq doengzhag dawz nyapnyaj soengq daengz ndaw bak gou. Hoeng, baezneix youh sawj gou saetmuengh lo. Miz mbangj doengzhag lumj yawj mbouj raen gou nei, cungj vut nyapnyaj youq giz liz gou mbouj gyae haenx, hawj seiqhenz gou yawj bae cungj uqatat. Sawqmwh, aen bingzyinjliu he gveng gvaqdaeuj bungq deng aen’gyaeuj gou, sawj gou gyaeuj- ngunh dava. Lij caengz caj gou singj gvaqdaeuj, boux hagseng sai sangsang hunghung he byaij gvaqdaeuj, dawz mbaw sigenj gauj mbouj gizgwz haenx nu baenz nyeuq he, yunghrengz gveng deng aendungx gou, lij yungh din dik gou dem.

Gou caen siengsim ha. Gyoengq doengzhag, cingj sou baezlaeng gingqcungh gij hong gou di ndeu, ndei lwi?

(seiq nienzgaep Liuj Swj- hanz)