Bineix “sam nyied sam”, Yizcouh Si gvaq ciet hoenghhwdhwd, nauhyied dangqmaz. Youq gak aen gingjdenj hung ndaw si caeuq gak aen cwngzgih cungj guh gak cungj minzsuz hozdung, miz gak cungj saujsu minzcuz conzdungj dijyuz doxdax, miz minzsuz ndawbiengz baijyienj, miz eu fwen doxdax, miz hawfwen “Go Liuz Sanhcej”, moix aen hozdung cungj ndeiyawj dangqmaz. Daengx si yanghcin、hagdangz、siciz danhvei、lajmbanj、segih daengj cungj baij byaujyenjdui daeuj camgya hozdung. Giz ceiq daegbied de dwg, youq gak aen dieg hozdung haenx, gwnz ciengz cungj sij miz Sawcuengh, angj lwgda vunz dangqmaz. Gyoengqvunz raen Sawcuengh le cungj haenh naeuz:“Neix cij dwg “sam nyied sam” Bouxcuengh raeuz!”

(Vangz Ging/黄 敬)