Bineix cietfwen “sam nyied sam” Bouxcuengh, Gveigangj Si Cinzdangz Gih Mungzgungh Yangh youq Sinhlingj Cunh Mbanjsinhgvei gawjbanh “Lingzgvi Bauj- sanh Daegsaek Lijyouz Mingzcunh Sam Nyied Sam” hozdung, angqhoh ngoenz- ciet. Ngoenzde, miz hekyouz daj Gvangjdungh、Hoznanz daengj swngj daeuj haenx caeuq gij ginzcung Gveigangj Si giz gyawj yanghcin daeuj haenx gungh cien lai vunz doxcomz youq giz ndeu, angqhoh cietfwen “sam nyied sam” Bouxcuengh.

Aen angqhoh hozdung daj eu fwencouxhek Bouxcuengh caeuq bau aendomq deihnyaennyaen hainduj, doengh bouxheiq daenj buh moq vaq moq, riengz sing yinhyoz, doq eu fwen doq diuqfoux, angqcoux doenghboux hek daeuj youz. Ciepdwk, ciengq go、diuq foux minzcuz、diuq fouxsaux、 eu fwen, doiq fwen、gangj siengswngh daengj haujlai aen cezmuz laebdaeb hwnj daiz byaujyenj. Boux diuqfoux din mbaeu fwngz unq, boux eu fwen sing wenqneuneu. Daengx aen daizheiq ndeiyawj raixcaix, nauhyied dangqmaz. Doengh boux yawjngonz mboujdanh lwgda ndaej yawj baez gaeuq ndeu, caemhcaiq ndawsim ndawhoz cungj ndaej yiengjsouh baez gaeuq ndeu. Caezgya cungj yaengx lwgfwngzmeh haenh naeuz, gij hozdung neix, yienh’ok gij fungcingz fungsug caeuq swnghdai vwnzva vahdoj naekna Bouxcuengh raeuz, ndeiyawj lai raeuh.

Mungzgungh Yangh gawjbanh baez hozdung cietfwen “sam nyied sam” Bouxcuengh neix, yienh’ok le doenghgij minzcuz fungcingz Bouxcuengh, hungz- yangz doenghgij cingsaenz ndiepgyaez mbanjranz, ndiepgyaez minzcuz, ndiep- gyaez swnghhoz, doxgiet doxhuz, haenq- rengz baenaj, hawj gyoengq beixnuengx Bouxcuengh gag roxnyinh miznaj, gag roxnyinh ndaej najsug, coicaenh guhbaenz aen fwnveiz ndei swnjcienz minzcuz vwnzva ndeu.

(Huz Bangjhangz/胡榜航)