●Daj 5 nyied 18 hauh hainduj, Gvangjsih Minzcuz Bozvuzgvanj gawjbanh“gak cuz yinzminz sim yiengq coh dangj——baijok gij huqlaex daengx guek saujsu minzcuz youq duenh ngamq laebguek soengq hawj Cunghyangh Cwngfuj”. Baez neix baijok 60 lai fuk doz nem 130 lai gienh doenghyiengh dijbauj.

(Vuj Yoz)

●Gaenh bi daeuj, Yungzsuij Myauzcuz Swciyen aeu dangjyenz guh boux sifan dajciengx, baenz gveihmoz dwk dajciengx duzdouq、duzyiengz、cwzvaiz daengj, coi nungzminz aeundaej laisou. Youz boux dangjyenz Liengz Cinfungh guhdaeuz, dazyinx Yungzsuij Cin Dunghliengz Cunh Siengzdai Swnghdai Yangjcizcangz moix bi ndaej gai duzdouqnoh gyawj 2 fanh duz, gai ndaej 100 fanh maenh doxhwnj, cinghsouhaeuj 30 lai fanh maenz.

(Liu Swjyenh)

●5 nyied 11 hauh, Yungjfuz Yen Minzcuzgiz cingj ndaw yienh yinzda、caizcwng、fazgaij、minzcwng、nungzyez、gyauyuz、suijli daengj 12 aen danhvei nem bumwnz gungh 26 boux mizmingz camgya minzcuz gunghcoz codanzvei, daihgya gangj le baenzlawz gaijndei gij gihcuj sezsih dieg saujsu minzcuz comzyouq, baenzlawz fazcanj ginghci, lwnhyaeng baenzlawz guh ndei hong minzcuz.

(Dangz Gingfuj)

●Laebdaeb geij ngoenz daeuj, Lungzswng Gak Cuz Swciyen cujciz doenghboux lauxhangz nungzyez gisuz haeuj mbanj roengz doengh, mienxfeiq daezhawj gisuz, son vunz dangdieg dajndaem lwgdumhgyaemq、haeuxnaz、makgam, bauj nungzyez swnghcanj ndaej swnhleih, neix ndaej vunzlai angqcoux.

(Veiz Gizyangz Vuz Haijvaz)

●5 nyied 11 hauh, Duh’anh Yauzcuz Swciyen Minzyijgiz 6 boux bae daengz giz lienzhaeh fuzbinz——Dunghmiu Yangh Sanhliz Cunh giz sifan dajndaem makhwzdauz Mbanj- runghdoeng, fat vafeiz caemhcaiq son’gyauq doenghboux dajndaem makhwzdauz de; ndaw minzyijgiz daengxcungq ganbu cizgungh gag comz ngaenz cawx 2 dun vafeiz fat hawj 12 ranz ndaem makhwzdauz.

(Veiz Cinhlingz)