Ngoenzciet cuengqgyaj, gou caeuq daxboh bae epbya.

Ngoenz haenx gyanghaet, ndit raeuj rumz ndei. Gou caeuq daxboh daiq duzndwen, faexset caeuq aen doengjiq, angqvauvau dwk bae henz dah epbya. Dou daeujdaengz henz dah’iq, daxboh sien daj ndaw bingz yaek duz ndwen ndeu okdaeuj, caiq aeu fagmid heh baenz sam gyaengh, yienzhaeuh dawz gyaengh ndeu con gwnz bakset bae, doeklaeng yungh rengz fit diuzset roengz raemx bae. Gou caeuq daxboh naengh youq diegnywj henz dah, caemcingx caj dwk. Gvaq yaep ndeu, gyaemset sien doengh mbat ndeu, yienzhaeuh menhmenh caem roengz raemx bae. “Itdingh dwg miz duzbya daeuj gwn ngaeuh lo, lij dwg duzbya hung dem!” Gou angq dwk naeuz. Daxboh lienzmuengz buet gvaqbae, yungh rengz dawz faexset fit hwnj gwnz diegnywj daeuj. “Yo, caen dwg duzbya hung ha!” Gou angqvauvau dwk hemq hwnjdaeuj. Gou sikhaek iet fwngz bae gaeb duzbya, duzbya baez cak, daj ndaw fwngz gou rod deuz lo. Gou youh caiq coemj hwnjbae, baezneix cungjsuenq gaem maenh lo. Gou angq ndaej fwngz gaem duzbya youh diuq youh ciengq. Haujlai nanz gou cij dawz duzbya cuengq ndaw doengjiq bae. Gou sim siengj: Haemh neix gou ndaej gwn nohbya singjsien lo.

Gou caeuq daxboh laebdaeb ep ndaej haujlai bya, yawj gij bya ndaw doengj diuqbumbum, gou caeuq daxboh angq- vauvau ma ranz lo. Ngoenzneix epbya caen mizyinx ha!

（指导老师：林胜仙）