Bonjbauq siusik(gicej Mungz Sugij/蒙树起) 4 nyied 27 hauh daengz 30 hauh, Cunghyangh Cujcizbu、Cunghyangh Dungjcanbu、Guekgya Gyauyuzbu、Guekgya Yinzliz Swhyenz Caeuq Sevei Baujcangbu、Guekgya Minzveij daengj haj buveij gapbaenz ciendaez diuyenzcuj, diuyenz gak minzcuz ganbu gih raeuz baenzlawz hag yungh Vahgun Sawgun caeuq vahsaw saujsu minzcuz.

Swcigih Minzveij、Minzyijveij cujyin Luz Yenbenj gig yawjnaek baez diuyenz haj buveij neix, iugouz Swcigih Minzyijveij caezcingj bwh ndei veibau caizliu, caemhcaiq youq 4 nyied 28 hauh cujciz ciuhai aen codanzvei Gvangjsih veibau gij hong ciendaez diuyenz “doicaenh dieg minzcuz gak minzcuz ganbu hagsib guekgya vahsaw doengyungh caeuq vahsaw saujsu minzcuz cwngcwz nem banhfap”guekgya haj buveij haenx. Swcigih Minzyijveij、Swcigih Minzveij、Swcigih Dangjveij Cujcizbu、Swcigih Dangjveij Dungjcanbu、Swcigih Yinzliz Swhyenz Caeuq Sevei Baujcangdingh、Swcigih Gyauyuzdingh daengj bumwnz gonqlaeng hawj diuyenzcuj veibau le gih raeuz wngqyungh vahsaw saujsu minzcuz、saujsu minzcuz yinzcaiz beizyangj nem sawjyungh、gak minzcuz ganbu sawjyungh song vahsaw、song vahsaw sonhag、guekgya vahsaw doengyungh sawjyungh daengj cingzgvang. Gyoengq conhgyah Gvangjsih Minzcuz Yijvwnz Gunghcoz Conhgyah Swhsinz Veijyenzvei hix doiq beizyangj lauxsae song vahsaw caeuq gauhcwngzsw yinzcaiz lwnhgangj le gij yigen nem genyi swhgeij.

Luz Yenbenj caensim docih guekgya haj buveij gvensim caeuq ndiepgyaez Gvangjsih, caemhcaiq baij diuyenzcuj daeuj Gvangjsih diuyenz. De naeuz, guekgya vahsaw doeng- yungh baij youq vih daih’it, gijneix Gvangjsih nyinhrox daengz vih、cosih miz rengz、cwngzyau mingzyenj. Hoeng Gvangjsih dwg Bouxcuengh swcigih, cunghyangh wnggai engqgya yawjnaek Vahcuengh、Sawcuengh caeuq vahsaw saujsu minzcuz gizyawz. Yinzminz siengj yungh Sawcuengh, faplwd baujcang Sawcuengh, aeu daj cwngci sihyau、daj vwnzva sihyau、daj minzcuz doxgiet、daj aeueiq minzcuz cingzganj sihyau bae gvensim vahsaw saujsu minzcuz.

4 nyied 28 hauh banringzgvaq, Nanzningz Si ciuhai codanzvei, siveij cujcizbu daengj 6 aen buwmz hawj diuyenzcuj veibau le gij cingzgvang gak minzcuz ganbu baenzlawz hagsib sawjyungh Vahgun Sawgun caeuq vahsaw saujsu minzcuz、“song vahsaw” sonhag Nanzningz Si daengj.

4 nyied 29 hauh, diuyenzcuj bae daengz Lungzanh Yen Nanzhih Cin Dangjveij Cwngfuj、yen fazyen、yen genjcazyen daengj bumwnz guh diuyenz, doenggvaq caeuq gak minzcuz ganbu lwnhgoj、fat diucaz caizliu、guh vahsaw cwzsi daengj fuengsik, ciengzsaeq diuyenz le gij cingzgvang gihcwngz gak minzcuz ganbu hagsib sawjyungh “song vahsaw”.