Siengj baujhoh ndei simdaeuz, cawz hableix lienhndang、onjdingh cingzsi、gaiq ien noix ndoet laeuj le, wng lai gwn gijgwn baujhoh simdaeuz haenx.

Bya: Ndaw lauz bya hamz miz cungj cwngzfwn daegbied he, ndaej baujhoh simdaeuz. Byaginhcangh、byalae、byamanyiz daengj cungj ndaej gwn. Dwzgoz sinhcangbing conhgyah yenzgiu yienjseiq, moix ngoenz bingz- yaenz gwn 30 daengz 50 gwz bya, ndaej noix hawj simdaeuz baenzbingh.

Gyaeqgaeq: Gyaeqhenj yienz- naeuz hamz miz youzlauz haemq lai, danhseih cujyau dwg lonjlinzcij, ndaej hawj danjgucunz ndaw lwed caeuq lauznaed bienq iq, caemhcaiq baujciz fouz youq baihgwnz, mbouj yungzheih caem roengz bangx sailwed bae. Moix ngoenz gwn aen daengz song aen gyaeqgaeq, doiq simdaeuz cibfaen miz ik.

Duhhenj: Ndaw duhhenj hamz miz yamazsonh caeuq yamazyouz- hihsonh daengj bubaujhoz cihfangz- sonh gig lai, ndaej gyangqdaemq danjgucunz, youq itdingh cingzdoh gwnzde ndaej baujhoh simdaeuz.

Daeuzseng: Yihyoz yenzgiu nyinhnaeuz, caeuq lauzmou daengj doxbeij, lauzhanq、lauzbit ca mbouj lai caeuq youzmakgyamj doxlumj, ndaej baujhoh simdaeuz.

Mbawcaz: Ndaw cazloeg hamz miz vangzvanzcunz gig lai, ndaej gaijndei danjgucunz ndaw lwed caeuq linzcij bijli, gemjsiuj gvancang bangx doenghmeg giet ndongj giet ndaek. Ndawde gij gahfeihgenj ndaej hawj bangx sailwed soenglon, hawj de baujciz danzsingq, hawj sailwed bienq gvangq, baujcwng lwed ndaw simdaeuz lae doengswnh. Linghvaih, de lij ndaej gyangqdaemq danjgucunz dem.

Daepvaiz: Ndaw daepvaiz hamz miz doengz doxgaiq gig lai. Doengz dwg cungj cujyau cwngzfwn gyauhyenzmeiz ndang vunz raeuz, gyauhyenzmeiz dwg gij doxgaiq coicaenh gyauhyenz danbwz caeuq danzsingq habbaenz haenx, gyauhyenz danbwz cix dwg hawj sibauh bangx sailwed lienzciep hwnjdaeuj maenhdwt, baujciz sailwed danzsingq. Ndigah, ciengz gwn daep- vaiz doiq simdaeuz cibfaen miz ik.