Gij huzlauxbaeg doxgaiq ndaw byaekbohcai caeuq lauxbaeg nding ityiengh ndei, vunzraeuz ngoenz- naengz gwn 50 gwz byaekbohcai, couh ndaej muenxcuk aenndang aeu miz gij veizswnghsu A sihyau; doengzseiz, gij veizswnghsu C ndaw byaekbohcai hix beij makyungz sang boix lai.

Boux baenz hezyaz sang caeuq boux baenz haexgaz、boux baenz gyaeuj in、boux baenz naj hoengz, ndaej dwk byaekbohcai roengz raemxgoenj bae log 3 daengz 5 faen cung le vez hwnj cab soiq, dwk di youzhom caeuq di gyu ndeu gyaux gwn, ngoenz 2 baez, ywyauq gig ndei. Aenvih ndaw byaekbohcai hamz miz caujsonh, de ndaej caeuq gij gai ndaw gijgwn wnq ndaw dungx giethab baenz caujsonhgai nanz yungzgaij he, hawj ndang vunz mbouj yungzheih supsou gai, ndigah mbouj ndaej gwn lai.