Bineix duenh gvaq ciet“sam nyied sam Bouxcuengh”，Siengcouh Yen doenggvaq gawjbanh baenz buek hozdung hawj vunzlai gvaq ndaej angqyangz, swnjcienz le vwnzva minzcuz, hawj daengx yienh gak minzcuz cungj ndaej angq gvaq ngoenzciet minzcuz.

Vih cujciz nem guh ndei baez hozdung neix, youq sam nyied co, Siengcouh Yen couh comz senhconz、minzcuz、vwnzdij、lijyouz daengj bumwnz, doengzcaez okmaeuz ok- rengz, gietdingh dawz baez ciet neix banh baenz aen ciet vunzlai caemh gvaq youh miz minzcuz nem dangdieg daegsaek de.

Duenh guh hozdung de, aen yienh neix aeu senhconz cwngcwz nem banh minzcuz vwnzdij hozdung guhdaeuz, youq ndaw yienhsingz aen veicangz daeuz de gawjbanh minzcuz cwngcwz fazgveih senhconz camdap fuzvu hozdung、minzcuz genswnhcauh byaujyenj、comz eu Fwencuengh、vwnzyi vanjvei、baijok siengben minzsuz、doxdax guh dijyuz minzcuz mizyinx daengj. Youq Majbingz Cin aen veicangz iq de gawjbanh dox- dax eu Fwencuengh、guh hawfwen Fwencuengh、byaujyenj gofoux siuj- binj ndawbiengz、doxdax guh dijyuz minzcuz mizyinx、guh diuz gai gijgwn ndei daengj. Doengzseiz gak yanghcin、gak hidungj hix guh hozdung.

(Veiz Veimingz/韦卫明)