Aendaep dwg cungsim gi’gvanh fucwz ndang vunz daise haenx, de youz 50 fanh mbawdaep rom baenz, mbawdaep youh daih’iek youz 50 fanh aen sibauhdaep habbaenz, bingzseiz daih’iek miz 1/5 fazveih cozyung, gizyawz 4/5 dwg cajdeq youq ndwi.

Ndigah, couhcinj miz 4/5 daep cujciz deng buqvaih, lij miz 1/5 mbouj deng buqvaih cungj cingzgvang neix lajde, lij ciuqyiengh yinhhengz ndaej. Saedsaeh daeuj gangj, boux vunz raeuz couhcinj haidau gvej aen’daep bae 4/5, lij ciuqyiengh veizciz diuzmingh mbouj dai ndaej. Ndigah, couhcinj fatseng gitgaz hix mbouj itdingh baenzbingh. Baez fatyienh ndaej bingh, ciengz dwg gaenq haeuj naek lo.

Baihlaj lied 11 cungj bingh- yiengh okdaeuj, danghnaeuz miz geij cungj doengzseiz okyienh, ginggvaq bouj yingzyangj roxnaeuz yietnaiq ndei le bingh lij caengz ndei, couh wnggai ngeiz daengz aen’daep miz bingh lo.

(1)Daengx ndang naetnaiq caemhcaiq ciemh ngoenz ciemh youqgaenj;

(2)Amqbak mbouj ndei, miz rubmyaiz cungj ganjgyoz neix;

(3)Laebdaeb gamjdaengz loq ndat, roxnaeuz buenx miz lau nit;

(4)Cuyiliz mbouj yungzheih cizcungh;

(5)Bingzseiz gwn laeuj ndaej lai, seizneix raemhrwnh gemjsiuj;

(6)Saeknaj amq mbouj rongh- lwenq;

(7)Saeknoh lumj vuengzbiu nei;

(8)Saeknyouh henj lumj laeuj- bizciuj nei;

(9) Haexgaz, saekhaex haumong;

(10)Gamjdaengz aek ciengq;

(11)Duenh aek baihgwnz mwnh in.