Bonjbauq siusik(gicej Liengz Cingz/梁晴 dunghsinyenz Moz Binh/莫 滨) 4 nyied 8 hauh, Swcigih Minzyijveij soengq doenghgij saw yungh daeuj guh Cuengh Gun song saw vah gyauyuz beizyin hawj Gvangjsih Swhfan Yozyen Cuhdwngj Gyauyuz Yozyen, Swcigih Minzyijveij fusinzsiyenz Yangz Yigez、Gvangjsih Swhfan Yozyen fuyencangj Bungz Ningz daengj camgya yizsi soengq saw.

Baez soengq saw neix, Swcigih Minzyijveij gungh soengq 350 bonj《Sawloih Cuengh Gun》 daengj gij saw hongdawz nem《Vahcuengh Sawcuengh Suijbingz Gaujsi Yingsi Cijnanz》daengj gij saw canhgauj, Gvangjsih Minzcuz Bause soengq《Gvangjsih Minzcuz Bau》banj Sawcuengh、banj Sawgun ngamq okbanj de gak 100 faenh, Gvangjsih Sam Nyied Sam Cazcise soengq《Sam Nyied Sam》(banj Sawcuengh) ngamq okbanj de 100 bonj. Song aen danhvei neix naeuz coglaeng soengq bauqceij nem cazci hawj hagseng ndaw ban Cuengh Gun song saw vah.

Ciuq cam rox, daj 2013 nienz daeuj, Gvangjsih Swhfan Yozyen ndaej Swcigih Gyauyuzdingh dingh- guh aen gihgou beizyin daengx gih Cuengh Gun song saw vah lauxsae, caemhcaiq youz Cuhdwngj Gyauyuz Yozyen moix bi beizyin Siujyoz Gyauyuz Conhyez(dingh son’gyauq Cuengh Gun song saw vah) ban conhgoh 100 boux hagseng, youz Gyauyuz Gvanjlij Yozyen beizyin daengx gih Cuengh Gun song saw vah saedniemh yozyau 106 boux lauxsae mizmingz.