A

Seizcin aenndang bouxlaux yungzheih noix veizswnghsu A, neix dwg bingh saidiemheiq yinxhwnj. Aenvih conghndaeng、conghhoz daengj cw miz luep nemmuek caezcienz ndeu daeuj laengzdangj nengzbingh ciemq haeuj, ndaej gaj dai mied raeg nengzbingh caeuq binghdoeg najnaeng. Bouxvunz noix veizswnghsu A, couh nanz hoh ndaej luep nemmuek sibauh neix caezcienz. Linghvaih, noix veizswnghsu A hix rox yingjyangj lwgda yawj doxgaiq, ndang vunz menjyizliz doekdaemq.

Itbuen moix ngoenz gwn naed yizganhyouz ndeu, couh ndaej mizyauq dwk boujcung veizswnghsu A lo. Ndaw nohbya、gyaeq、daep caeuq dungxsaej doihduz hamz veizswnghsu A haemq lai, ndaej lai gwn di. Lauxbaeg nding、byaekgep、makyungz、namzgva、makgam hamz veizswnghsu A hix haemq lai. Danhseih, boujcung veizswnghsu A daiq lai hix rox fatseng doegsingq fanjying, dauqfanj sonjhaih ndangdaej gengangh.