Seizcin dwg bi he ndawde aen geiqciet ceiq ndei ndeu. Siengj hawj heiq daep swnh heiq seizcin, cawz haeujsim diuzleix cingzsi caeuq habdangq lienhndang le, hableix gwnndoet hix maqhuz youqgaenj. Ciengzsaeq daeuj gangj, couh dwg haeujsim baihlaj geij diemj:

Noix gwn soemj lai gwn diemz. Youq ndaw seizcin, vunz- raeuz aeu noix gwn di huqsoemj he, lai gwn di huqdiemz ndeu. Cuk maenzcienz makcauj ciengx daep yaugoj haemq ndei. Ndaej aeu 50 gwz maenzcienz, 20 gwz makcauj, haeux(haeuxciem caeuq haeuxcid gak buenq) 80 gwz, swiq seuq le caeuq maenzcienz、makcauj roengz gu, gya raemx hai feizhaenq cawj goenj, doeklaeng gaij yungh feiz- numq ngauzcawj daengz cuk gwd gwn, ngoenz baez.

Lai gwn byaekbohcai. Byaek- bohcai ndaej nyinh yaem nyinh sauj、hoh daep ciengx lwed, boux aenvih seizcin yaem daep mbouj gaeuq yinxhwnj baenz hezyaz sang、gyaeuj ngunh、nyouhniuj、lwedhaw haenx gwn le ndaej bangbouj ceihyw. Hahfuz Dayoz miz hangh yenzgiu ndeu fatyienh: Boux cungnienz、bouxlaux moix singhgiz gwn 2 daengz 4 baez byaekbohcai, ndaej gyangqdaemq vangjsimoz doiqvaq. Boux baenz lwedhaw ndaej aeu 100 gwz byaekbohcai cawj dang gwn. Boux baenz da myox ndaej aeu byaekbohcai、daepyiengz gak 500 gwz, hai feiz coemh raemx goenj le dwk daepyiengz、byaekbohcai roengz cawj, caiq dwk di gyu、youzlwgraz、veicingh he cawj cug gwn.

Aeu daep bouj daep. Daep- mou、daepgaeq cungj ndaej bouj daep. Bouxvunz siliz ndei mbouj ndei caeuq daep miz gvanhaeh maedsaed. Boux da myox mboujfuengz aeu daepmou 100 gwz, duhheu 60 gwz, haeuxsan 100 gwz, di gyu、veicingh he caez cawj cuk gwn. Ciengz gwn ndaej bouj daep ciengx lwed、siu ndat singj da、 meijyungz naengnoh.