Duzdouq yaek bae ndaw ndoeng- faex guhcaemz.

Duznou naeuz ndaw ndoeng doenghduz yak lai, gienq de gaej bae. Duzdouq naeuz: “Gou miz banhfap.”

Duzdouq daeuj daengz ndoeng- faex henz bak aen gamj iq ndeu.

Saeceij cingq ninz youq ndaw gamj yietnaiq, baez raen duzdouq couh gaemh dawz duzdouq, saeceij riuhwhw naeuz:“Gou caengz bae ra mwngz, mwngz dauq gag soengq daeuj.” Duzdouq riu naeuz:“Saeceij daihvuengz, gou cingq dwg cienmonz daeuj ra mwngz ne.” Saeceij baez dingq, ngaez lo. Duzdouq gipmuengz naeuz:“Daeggo ha, mwngz dang daihvuengz ndaw ndoeng, guhlawz yungh gag ok dou bae ra gwn ne? Gou bae ra gij ndei gwn daeuj hawj mwngz ba.”

Saeceij ngeix:“Aen siengjfap neix ndei bw, gou baenzlawz cungj mbouj ngeix daengz gvaq ne?” Yienghneix, couh doengzeiq hawj duzdouq bang de ra gijgwn.

Saeceij ndoj youq ndaw gamj ninz, duzdouq youq rog gamj sij faenzcieng.

Mbouj geij nanz, duz manaez ndeu daeuj lo. Manaez raen duzdouq bizbwdbwd, siengj gwn duzdouq.

Duzdouq myab raen manaez daeuj, couh naengh engq soh lo, mbouj vueng mbouj muengz youq gwnz ceij sij hwnjdaeuj. Manaez geizheih lo, cam:“Douqiq, mwngz nanzdauh mbouj lau gou ma? Mwngz sij gijmaz ne?” Duzdouq sez da yawj de mbat ndeu, nyaeuqnyaeuq ndaeng naeuz: “Ci, gou lau mwngz? Gou cingq sij《Duzdouq Baenzlawz Gwn Manaez》ne.” Manaez riuhaha naeuz: “Duzdouq gwn manaez? Coenz vah neix dwgriu lai lo!” Duzdouq naeuz:“Mbouj saenq? Mwngz gamj caeuq gou haeuj gamj bae lwi?”

Yienghneix, duzdouq yinx manaez haeuj gamj bae. Gvaq yaephe, duzdouq gag ok gamj daeuj, laebdaeb sij faenzcieng.

Mbouj geij nanz, duz mouduenh ndeu daeuj lo. Mouduenh baez raen duzdouq, couh yakyanyan sek:“Hw, mwngz duz douqiq neix, vaiqdi deuz!” Gangj sat couh siengj aeu heujngaz gunx duzdouq. Duzdouq ngiengx gyaeuj yawj de mbat ndeu, youh mbouj vueng mbouj muengz laebdaeb youq gwnz ceij sij hwnj- daeuj, naeuz:“Mwngz heuh bouxlawz deuz ha?” Mouduenh gig geizheih, cam: “Mwngz sij gijmaz ne?” Duzdouq gyaeuj hix mbouj ngiengx, han naeuz:“《Duzdouq Baenzlawz Gwn Mouduenh》.”Mouduenh riuhaha naeuz:“Duzdouq gwn mouduenh? Caen ndeiriu ha!” Duzdouq caem- dingh naeuz:“Mbouj saenq? Mwngz gamj gaen gou haeuj gamj bae lwi?” Yienghneix, duzdouq youh daiq mouduenh haeuj gamj bae.

Saeceij gwn imq le, bomz youq ndaw doi ndok manaez caeuq ndok mouduenh yaek heuj.

Yienghneix ngoenz gvaq ngoenz, saeceij bizbodbod lo.

Ngoenz ndeu, duzdouq youq rog gamj, daekeiq naeuz:“Saeceij daihvuengz, gou yaek baema lo, docih mwngz buenx gou guhcaemz baenzlai mizyinx! Hawj mwngz yawjyawj gij faenzcieng gou ba.” Gangj sat, dawz faenzcieng swhgeij sij haenx vut haeuj gamj bae. Saeceij baez yawj, cij raen gwnz ceij sij《Duzdouq Baenzlawz Ceih Saeceij》.

Saeceij hozgaek lo, “ngo” sing ndeu, yaek roemx bae coemj duzdouq, hoeng, de gaenq biz ndaej ndonj mbouj ok gamj daeuj lo.

(Ganh Sozvwnz/甘说文 bienhoiz)