Caeuq baengzyoux naengh youq bakdou aendiemq boh de hai haenx gangjgoj. Aen diemq bangxhenz dwg diemq gai ceh haeuxyangz. Seizneix gaenq haicin lo, gyoengq vunz ndaw mbanj cingq daeuj cawx ceh baema yaek guh cin. Gyoengq vunz sing cam sing gangj, nauhyied dangqmaz.

Miz doiq gvanbaz ndeu soengz youq baihrog vunzlai, lumj dwg doxceng nei, gangj sing daegbied hung. Sijsaeq dingq, cij rox dwg mehyah haenx nam dwk mbouj dingz.

Dingq le geij faencung, dou dingq ok gij saehcingz goekgaen dwg baenzneix: Songde ngamq daeuj neix le, bouxgvan roengz ci lumz dawz yaekseiz lo, mehyah rox cix fatheiq ngaungau, naeuz de raek dungx mbouj raek sim, ciengzseiz lumz gij doenghyiengh swhgeij, cungj vunz yienghyiengh cungj siengj baihgya, de swnhgeiz youh veiq ok gij saeh doenghbaez daeuj, naeuz bouxgvan bi’gvaq cawx gij ceh haeuxyangz haenx mbouj ndei, ndaem ok gij haeuxyangz aen mbouj raez, nyaq hung naed youh baeb, souhaeuj daemq lai, bineix de aeu gag bae genj aeu ceh haeuxyangz.

Mehyah nam dwk byoegbyoeg, sing beuq gangj youh vaiq, geij coenz vah, raemh bae raemh dauq, bak de hix cungj mbouj rox naet.

Hainduj gou lij dwg rwzswix haeuj rwzgvaz ok, doeklaeng yied dingq sim yied fanz . Bouxgvan deng ndaq haenx dauq dwg dinghdingh soengz dwk mbouj guhsing, lij seiz mbouj seiz hawj yah de ndoet song gaemz raemx gaij hozhawq. Yawj daeuj de caen dwg cingznyienh hawj yah de nam baez gaeuq ha!

Caj yah de haeuj diemq bae genj aeu ceh haeuxyangz seiz, gou cam bouxsai haenx naeuz:“Daeggo, beixsauj raemhraez nyaenx lai, mwngz vihmaz cungj mbouj guhsing saek coenz ne?” Bouxsai cienq ndang coh gou, naj fwt bienq hoengz, de sing daemq dwk naeuz: “Langh gou guhsing, de vah engq lai, nam ndaej engq deih, sing gangj engq haenq, gou cijmiz caemrwg dingq de nam, louz de gag nam gag dingz ba.”

“Caemrwg doiqdaih hix mbouj ndaej dawz saehcingz gaijgez ndei ha?”

“Caemrwg dingq de gangj dwg mbouj hawj saehcingz loengh hung ha. Gou nyinhnaeuz gij saeh bingzseiz raeuz cungj bungz daengz haenx hix cungj mbouj ndaej cienzbouh gaijgez ndaej, aeu caemrwg bae hawj de menhmenh bingzfuk roengzbae, hix suenq aeu mbouj yungzheih lo.”

Dingq bouxsai baenzneix gangj le, gou riu dwk naeuz:“Caemrwg dingq dwk couh dwg aen banhfap ak mwngz lo!”

Bouxsai dingz yaep ndeu, naeuz: “Neix dwg baujhoh aen sim, caemrwg hoh sim.”

Dwg ha, rox caemrwg dwg cungj dungxcaiz boux coengmingz, de hawj mwngz caemdingh roengzdaeuj ngeix- naemj, doengzseiz hix hawj seizgan hawj doengh boux siengj ra saeh haenx, louz naj hawj songfueng.

Geiq ndaej ngamq haeuj aen hagdangz daeuj hwnjban seiz, hag- dangz moix aen singgeiz cungj aeu hai hoih. Dou geij boux nienz oiq bannomj doiq gij saeh ndaw hagdangz cungj maij dawz gij siengjfap ndaw sim swhgeij gangj okdaeuj seuqsatsat bae, coengzlaiz mbouj louz saek di mbouj gangj. Gyoengq lingjdauj dingq le hix ngaekgyaeuj naeuz gangj ndaej ndei, dang aeu ndeindei bae guh; doengh boux lauxsae banlaux hix riu naeuz swhgeij gaen mbouj hwnj seizdaih moq lo, gij siengjfap bouxcoz dwg aen siengjfap moq, dwg saehndei, aeu lai bae gujli, lai bae cihciz cij ndaej. Gyoengq bouxcoz miz vah couh aeu gangj, neix mboujdanh ndaej daezswng gij gunghcoz gyauyuz suijbingz raeuz, hix ndaej coicaenh aen cizdij raeuz mboujduenh byaij baenaj. Gyoengq dou dingq le ndaw sim cungj van baenz diengzrwi nei, diemzsisi, vansubsub, nyinh ndaej daengx ndang cungj dwg rengz caeuq saenqsim, laemxsim aeu roengzrengz guh ndei gij hong sonhag.

Heuh dou siengsim daengz daep dwg, youq seiz aeu bingz youhsiu caeuq daezswng ngaenzhong haenx, dou geij bouxcoz cungj mbouj miz saek boux ndaej bingz hwnj youhsiu lauxsae roxnaeuz youhsiu banhcujyin, daezswng ngaenzhong hix cungj dwg mbwn rengx ngangx gyaeuj hwnj mbwn caj——Gon ngonzngangx.

Seizgan nanz le, swhgeij ndaw sim gag naemj: Gyoengq lingjdauj mbouj itdingh maij doengh boux maij gangjvah haenx. Miz vunz aiq baenzneix naemj: Maij gangjvah couh dwg vah lai, vah lai couh dwg faeuz, dwg ndiengq, ndigah gyoengq vunz hix mbouj haengjheiq. Mizseiz mbouj naemj ndei couh gip dwk gangj ok doengh gij simsiengj, couh mbouj ndaej hawj dingzlai vunz sim fug hoz fug, neix couh mbouj ndaej daengz lingjdauj ngaekgyaeuj haenh ndei lo. Seiz mbouj ngaekgaeuj lai le, gyoengqvunz hix couh mbouj daiq haengjheiq mwngz lo.

Miz vah naeuz, boux gangj fouzsim, boux dingq miz eiq. Yienznaeuz mbouj dwg coenzcoenz vah cungj hawj vunz simnden, mizseiz baezgonq gangj gvaq, doeklaeng caiq miz vunz dwen okdaeuj bingzlwnh, caemhcaiq miz vunz dem gyu gya youz baez gangj, neix couh sieng vunz lo. Youq ndaw vunz lai, bak lai vah lai, lij dwg caemrwg bae dingq habngamj, doenghboux lumj gou mbouj rox gangjvah haenx, raeuz mbouj rox gangjvah, mbouj bae gangjvah cungj guh ndaej daengz ba?

Naemj sam ngeix seiq le, gou roxyiuj: Mbouj gangjvah vah couh mbouj lai, vah mbouj lai mbouj dwg mbouj gangjvah, yaek gangjvah aeu siengj gonq, siengj ndei le caiq gangj okdaeuj,yaek guh saeh aeu yaeng daeuj, yaeng ndei le caiq guh roengzbae.

Baezlaeng, gou aeu geiq maenh coenz vah neix: Caemrwg dwg gim, caemrwg hoh sim.