Seizcin sam nyied, roeg heuh va hom. Mboengqneix, Lingzyinz Yen Swcwngz Cin Beilungj Yauzcuz ginzcung gag cujciz gawjbanh hoihfwen, eu fwen gyau youx、eu fwen cienz cingz, eu fwen senhconz doxhuz doxndei, coicaenh le minzcuz doxgiet fazcanj, sawj minzcuz cingzngeih engqgya naekna.

Beixnuengx Yauzcuz Beilungj youq gwnz bya ndaw rungh, minzfungh minzsug gig miz daegdiemj, mehmbwk daenj buhvaq vava loegloeg, saek gig ronghsien, bouxsai buh dinj vaq raez, saek moqsag. Saimbwk beixnuengx Yauzcuz Beilungj maij dox cunz mbanj cunz ranz, eu fwen gyau youx, eu fwen guhcaemz, gij minzcuz vwnzva daegsaek noengznwdnwd haenx sawj vunz yawj le cungj lumz mbouj ndaej. (Siuh Fazlingz)