Bonjbauq siusik(gicej Banh Cauzyangz/潘朝阳) Youq gwnz hoih Daengx Guek Yinzda Daihsam Baez Veiyi, daengx guek yinzda daibyauj、Swcigih Minzveij cujyin、Swcigih Minzyijveij cujyin Luz Yenbenj daezgyau《Gij Genyi Gvendaengz Cienzmienh Gyarengz Guh Hong Vah Saw Minzcuz》, ok bet aen geiqmaeuz.

It dwg genyi guekgya mizgven bumwnz comz rengz nem anbaiz vunz youq daengx guek caz gij cingzgvang vah saw saujsu minzcuz, roxyiuj caez gij cingzgvang gizdieg、sawjyungh、swnjcienz、yenzgiu、henhoh nem iugouz gvendaengz vah saw saujsu minzcuz, ndaej gij baengzgawq engqgya sijsaeq hawj mizgven bumwnz dingh cwngcwz nem ok faplwd. Ngeih dwg genyi guekgya mizgven bumwnz caz nem rox doenghgij faplwd fazgveih vah saw saujsu minzcuz hengz ndaej baenzlawz yiengh, caz nem coi gak gaep gak bumwnz nyinhcaen ciuq gij faplwd fazgveih neix nem mizgven cidu hengz. Sam dwg genyi guekgya haidoengh gij cwngzsi guh hong ok《Faplwd Vah Saw Saujsu Minzcuz》, caemhcaiq dawz aen hanghmoeg neix coq haeuj“cibsam haj”laebfap giva ndawde bae, dienzbouj gizhoengq faplwd vah saw saujsu minzcuz. Seiq dwg genyi guekgya mizgven bumwnz gyarengz nem gaijndei hong youq dieg minzcuz guh song saw vah gyauyuz, hawj mizgven byauhcunj、sawson、sonhag nem gak cungj baujcang engqgya sijsaeq、bienq ndei. Haj dwg genyi guekgya mizgven bumwnz gyarengz guh hong beizyangj vunzcaiz vah saw saujsu minzcuz, gyarengz guh gij gihdi nem bingzdaiz beizyangj, boiq gaeuq vunzcaiz guh hong henhoh、sawjyungh、swnjcienz、fazcanj vah saw minzcuz. Roek dwg genyi guekgya mizgven bumwnz ciuq faplwd fazgveih、nyinhcaen hawj vah saw saujsu minzcuz ndaej youq ndaw bumwnz yungh, daegbied youq dieg minzcuz ndaej youq gvangjbo、denyingj、densi、oksaw、gyauyuz、swhfaz daengj ndawde sawjyungh. Caet dwg genyi guekgya mizgven bumwnz gyarengz guh hong ciengjgouq nem henhoh gij vah saw saujsu minzcuz yied yungh yied noix de. Bet dwg genyi guekgya mizgven bumwnz gyarengz yenzgiu vah saw saujsu minzcuz, daez gij baengzgawq lijlun hawj mizgven bumwnz cienzmienh gyarengz engq ndei guh hong vah saw saujsu minzcuz.