3 nyied 4 hauh, vihliux cienzciep Leiz Fungh cingsaenz, yinx hagseng hengzguh seveicujyi haedsim gyacizgvanh, Vanz- gyangh Mauznanzcuz Swciyen Vwnz- mingzban、Donzyenveij bae daengz Yananz Yangh Bohconh Siujyoz cujciz gaihcanj yiengq Leiz Fungh dungzci hagsib hozdung, aen hozdung neix aeu “daudwz mozfan gaemfwngz Leiz Fungh iq” guh cawjdaez. Ngoenzde, Bohconh Siujyoz miz 60 lai boux “ Leiz Fungh iq” bae daengz ranz boux daudwz mozfan Danz Ginhsuh, soengq va hawj boux daudwz mozfan neix. Danz Ginhsuh gangj gojgaeq daudwz mozfan hawj gyoengq hagseng dingq, caemhcaiq son gyoengq hagseng daj iq aeu hag guh boux vunz miz daudwz、doiq sevei miz yungh ndeu. Doeklaeng, gyoengq hagseng youh bae daengz Mbanjsunghyinz caeuq ginzcung baet gwnzgai, cingleix nyapnyaj; lij bae daengz ginglaujyen yawj bouxlaux gadog haenx, bang gyoengq bouxlaux bu mbonq baet ranz mad conghcueng.

Doenggvaq guh gij hozdung neix, sawj hagseng gag gyagiengz daudwz gensez, cinggoz laebhwnj yinzswnghgvanh, aeu ndaej yaugoj gig ndei.

(Vwnzmingzban)