Mwh baedaeuq, de gamj rap cwzyin, loek cix nyinh loek, deng nei cix ciuqyiengh genhciz, mbouj ndaej mbouj gangj yenzcwz cix wngq vunz. Mbangjseiz, gij vunzlai cauhfanj haenx daeuq de banhaemh daengz haetlaeng, mbouj ndaej wngq vunz nei de ciuqgaeuq mbouj wngq. De coengzlaiz mbouj haih doengzdoih, mbouj doi cwzyin hawj lajfwngz, engq mbouj doek longj rin goemh.

Seizhaenx, dienhvah ndaw ranz Veiz Gozcingh gaenq deng gaet goenq, seiqhenz ranz de ciengzciengz deng hungzveibingh gaemyawj. Bi 1967 ndwen 3 ndawcib, Couh Wnhlaiz dwk dienhvah ra mbouj deng Veiz Gozcingh, cix doengcei Gvangjsih Ginhgih itdingh yaek ra deng Veiz Gozcingh, heuh Veiz Gozcingh caen- ndang caeuq de doeng dienhvah. Gyanghwnz, ginhgih baij vunz caegcaeg daeuj daengz ranzyouq Veiz Gozcingh, cienjnaeuz le gij cijsi cungjlij. Ngoenz daihngeih banhaemh 10 diemj lai cung, gwnzgai vunz noix le, Veiz Gozcingh cij youz gij goengdaeuz bingre buenxdoengz daj aen dou gyanghongh iq gihdangjveij ndeu okbae, byaij coh ginhgih.

Veiz Gozcingh caeuq cungjlij doeng’vah le, cungjlij cam de Guengj- sae saeh baenzlawz yiengh, ndangdaej de youh baenzlawz yiengh? De genjdanh han le geij coenz. Cungjlij lwnh de nyi, dajsuenq youq Guengjsae cienzmienh guenjbing, youz de guh boux cujyin hoihguenjbing ndeu. Veiz Gozcingh naeuz:“Vunz de siengj dub laemx gou, naeuz gou dwg‘bouxrwix samfanj’, gou baenzlawz ok ndaej naj!” Cungjlij naeuz, gij hong de youz baihgwnz bae guh. Cungjlij youh naeuz:“Gawqyienz dwg yienghneix, mwngz vihmaz mbouj daeuj Baekging?” Seiz- haenx, mbangj goengdaeuz youqgaenj swngj wnq daengz Baekging le, cunghyangh cix habdangq baujhoh gyoengqde. Veiz Gozcingh naeuz, cunghyangh mbouj heuh gou bae, gou cix mbouj ndei seizbienh ok Guengjsae! Cungjlij heuh de doq bae Gvangjcouh, gangj gaenq caeuq gij goengdaeuz Gvangjcouh Ginhgih naeuz gvaq gij eiqdoz cunghyangh lo.

Ciuq gij cijsi cungjlij, gunghginh cix baij aen feihgih ndeu cienmonz soengq Veiz Gozcingh daengz Gvangj- couh. Mwh Veiz Gozcingh ok Namzningz, cijmiz gij goengdaeuz Gvangjsih Ginhgih rox de bae gyawz.

(caengz sat)