Gaxgonq, ndoeng lueg gyae miz song bohlwg, songde youq aenranz gaeuq aeu faexbenj daeuj dap ndeu. Ranz de gig hojndoq, daengx ranz yiengh ceiq daejbauj couh dwg duz vaizdaeg langh laj laeuz haenx.

Haemh ndeu rumz hung fwn raq, song bohlwg naengh gwnz laeuz gangjvah. Daeglwg doiq daxboh naeuz: “Gou ceiq lau duzguk caeuq bouxcaeg.” Daxboh dap naeuz:“Gou mbouj lau song yiengh neix, ceiq lau dwg ranzroh ha.” Ngamjhab gwqhaenx duzguk hung ndeu ndonj haeuj rienghvaiz laj laeuz daeuj yaek gwn daegvaiz, dingqnyi song bohlwg gangj gij vah neix doeksaet hwnjdaeuj. Sim naemj: Aiya! Vunz caeuq doenghduz cungj lau gou, vihmaz boux vunz neix mbouj lau gou fanjdauq lau ‘ranzroh’ ne!? Haengj- dingh dwg ranzroh yiengh doxgaiq neix lij beij gou yak lai ne. Duzguk yied naemj yied lau, mwh de yaek haeb dai duz vaizdaeg daeuj demh dungx, bouxcaeg daenj gyaep caeuq aemq buhluiq ndeu hix laeglemx ndonj haeuj rienghvaiz daeuj, laxlawz de hix siengj caeg daegvaiz neix. Danghyenz lo, da duzguk lumj da duzmeuz nei youq geh laep lij yawj ndaej cingcuj ne! Mboujgvaq gwq- haenx bouxcaeg yienghmaz hix yawj mbouj raen. Bouxcaeg yiet fwngz doeng lumh sae bumh. Duzguk raen bouxcaeg bumh haeuj daeuj le, sim engq lau lo: Dai lo! Neix haengjdingh dwg ranzroh lo. Caen dahraix! Yiengh dwglau nei etdi hix mbouj lau gou ne, yawjdaeuj baezneix gou dai laj fwngz de lo! Caiqnaeuz bouxcaeg neix baez lumh daengz duzguk, sim angq dangqmaz: Daegvaiz neix caen biz- bwd, ndei cauj hinggeq daeuj soengq laeuj ha. Doeklaeng de gig sug dawz diuzcag con haeuj ndaeng duzguk le, sim angqvauvau yien ok rienghvaiz daeuj.

Byaij ha! Byaij ha! Byaij ndaej haujlai nanz mbwn hix ciemhciemh bienq rongh lo. Bouxcaeg naemj: Daegvaiz baihlaeng miz geijlai gaen- suij ne? De ngeux gyaeuj fwd raen dwg duzguk ndangq hung le doeksaet hwnjdaeuj: Meh ha! Baenzlawz dwg duzguk ne? Mboujgvaq de fanjying gig vaiq, sikhaek daj henz hwet daz faegmid okdaeuj baek roengz baih- laeng duzguk bae. Duzguk ngaiz mid baek le, sim naemj: Gij rib duz ranzroh neix beij gou raeh lai lo, mbouj ndaej lo! De caengq rengz baez saet, diuzcag lamh ndaeng haenx ngaiz beng goenq lo, bouxcaeg hix lau dwk ruxringx benz hwnj gofaex henzndang bae ndojmingh. Duzguk ne cix goq mingh buet deuz baenaj. De buet haeuj ndaw rij laeg bae bungz raen duzlingz ndeu, heiq baeghehe bauq hawj duzlingz:“Lauxdoengz ha! Sou naeuz gou dwg duzvuengz doenghduz, hoeng ranzroh lij beij gou ak lai lo! Gij rib de youh rengz youh soem, gou ngaiz de nyab mbat ndeu ne, seizneix de benz hwnj gofaex ndeu bae!”

“Lauxdoengz ha! Youq gwnz namh doxmoeb gou roxnaeuz guh mbouj gvaq de, hoeng youq gwnz faex gou couh mbouj lau de lo!” Duzlingz dap naeuz. Gangj sat, duzlingz heuh duzguk daiq bae yawj ranzroh. Songde byaij daengz laj faex. Duzlingz aeu diuzgaeu gyaeuj ndeu cug swhgeij, lingh gyaeuj ndeu cug duzguk. Gig damzdingh doiq duzguk naeuz: “Mwngz naeuz ranzroh ak, gou benzhwnj gwnz faex bae caeuq de doxmoeb, mwngz youq laj yawj, danghnaeuz gou moeb mbouj gvaq de gou couh ngeux gyaeuj coh mwngz, mwngz couh beng gou roengzdaeuj.” Duzlingz gangj sat couh benz hwnj gwnz faex bae.

Caiqnaeuz bouxcaeg youq gwnz faex raen duzlingz caeuq duzguk daengz laj goek lau dwk saenzloblob, youh raen duzlingz benz hwnjdaeuj sim vueng daengz hanh conh nyouh yaet lo. Baenzlawz guh ne!? De sozsim dajhai dangzvaq ndeuq gong nyouh ndeu rwed roengzdaeuj. Duzlingz ngaiz nyouh rwed daengz da mbouj gamj hai bak mbouj gamj ak, doeklaeng nyaenx mbouj ndaej ngeuxgyaeuj doxdauq sup heiq cix ndaej. Duzguk bonjlaiz couh lau ranzroh, de baez raen duzlingz cienq naj dauqlaeng, laihnaeuz duzlingz heuh de buet deuz. Duzguk sikhaek byongh baenaj, duzlingz cix daj gwnz faex ngaiz vitvat roengzdaeuj. Duzguk doq buet doq naeuz:“Raen loba, gou naeuz ranzroh goengfou ak mwngz mbouj saenq! Baezneix mwngz fugsaw ba!” Gvaq ndaej haemq nanz, duzguk yawj doxdauq raen duzlingz bak aj heuj lik, byaij gvaqbae dik de naeuz: “Gou lau daengz haex nyouh conh liux, mwngz lij riu dem.” Duzguk mbouj rox duzlingz gaenq ngaiz rag dai lo.