Ngoenz singhgiz banringz gvaq, gou youq ndaw ranz mbouj miz gijmaz saeh guh, sawqmwh yawjraen youq ndaw bakcauq miz byaekheu caengz swiq. Gou naemj: Danghnaeuz gou dawz gij byaekheu neix swiq seuq bae, daxmeh couh noix sinhoj di lo.

Gangj guh couh guh, gou dawz swxbyaek cuengq youq henz suijlungzdouz, dawz aen buenz swiq byaek cuengq youq laj suijlungzdouz bae, yienzhaeuh vid genbuh hwnj. Gou hag gij yiengh daxmeh bingzseiz swiq byaek haenx bae swiq byaek. Gou sien yungh song fwngz dawz byaek baenz mbaw baenz mbaw bok roengzdaeuj, caiq menhmenh youq ndaw raemx nu gij uq gwnz byaek bae, baez mbaw baez mbaw swiq seuq. Cingq swiq dwk, gou lumh daengz yiengh doxgaiq unqnemnem he. Fwngz gou lumj deng daemj dienh nei suk dauqma. Gou baez yawj, yienzlaiz dwg duz nonheu hung ndeu youq gwnz mbawbyaek. Gou ganjgip dawz mbaw byaek miz non haenx vut bae. Gou yawj mbaw byaek deng gou vut bae haenx, siengj daengz daxmeh doenghbaez swiq byaek, mbouj rox bungqdaengz geijlai duz non lo, danhseih daxmeh cungj mbouj lau, menhmenh dawz duznon vut bae, caiq dawz mbaw byaek haenx swiq seuq. Naemj daengz neix, gou couh cengj mbei bae gip aeu mbaw byaek deng gou vut haenx, dawz duznon vut bae caiq daemh duznon dai bae. Yienznaeuz gou lau dwk naengnoh cungj hwnj naenggaeq lo, danhseih gou lumj dwk hingz baez ciengq he nei, angq dwk doq ciengq go doq swiq byaek lo.

Yawj gij byaek gou swiq seuq haenx, gou riu lo. Gou rox swiq byaek lo, gou ndaej bang daxmeh guh di hong lo.

（指导教师：韦龙）